今日係「三八婦女節」，喺中國嘅傳統思想入面，女人梗係要「入得廚房，出得廳堂」，但呢個年代嚟講，就唔係個個女人都「入得廚房」喇！至少今日Jenny去咗民建聯婦女事務委員會嘅入廚活動，見到委員會主席葛珮帆（EQ）拍住食物及衛生局局長陳肇始整「蝴蝶餃子」，睇住佢哋兩位「入廚房」，Jenny都係覺得可免則免喇……

 

 

講到包餃子兩位似乎都真係唔太擅長，尤其EQ指甲咁長帶返隻手套好啲噃！

 

EQ孖陳肇始一齊整餃子 結果……

 

　　唔知係咪因為對方係食衛局一姐，所以EQ就安排咗烹飪活動同陳局長交流交流，順便講吓民記婦女議題上嘅訴求。正所謂：「洗手！洗手！洗手！」一開始EQ好細心咁提醒局長整嘢食前要先洗手，不過其實講到包餃子，大家都係海軍鬥水兵咋！

 

　　話說佢哋今日要整一味「玉米紅蘿蔔蝴蝶餃」，當老師教佢哋用手指掐出蝴蝶隻翼出嚟，兩位女士都雞手鴨腳咁，EQ仲求救話掐極都掐唔到個形出嚟，小妹一望，EQ原來做咗Gel甲！靚就靚喇，不過又尖又長，難怪整起餃子上嚟姐手姐腳啦！睇嚟陳局長冇事先提EQ，指甲太長好易藏污納垢啦！仲要今日包嘅係花式餃子，唔怪之得EQ掐極都掐唔出個形啦！下次記帶返對手套喇！最後製成品係點……？Jenny只能夠講句：各花入各眼。

 

Tanya愛網購：日日敷Mask皮膚先滑溜！

 

　　講完入廚房，又講吓出廳堂吖！話說Jenny仲去咗公民黨新春傳媒茶聚，今日得陳淑莊（Tanya）一位女將出席，過咗個新年Tanya身型依然Fit爆，小妹一於就趁「婦女節」就同佢傾吓扮靚經先！數數手指，Tanya已經40有7，不過真心皮膚同身型算Keep得唔錯，佢都直言：「女人唔Keep好易老！」秘訣之一就係日日敷Mask！仲提醒Jenny唔駛用貴價嘢，平平哋10蚊塊嗰啲已經夠，佢自己就係買日本牌子嘅Mask。

 

　　雖則身型好，都要識襯衫，Tanya近年著衫係有一手嘅，佢就大爆自己其實已經好耐無行街Shopping，一切靠網購搞掂，大讚非常方便。就咁睇嚟，Tanya似乎冇咩中伏（當然中咗都唔會畀大家知），唔似得小妹成日收到嘅衫都貨不對辦。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情