收藏文章 

2018-05-02

後生仔唔願去大灣區做嘢 郭偉強開PC冇對數慘被跣?

  自從中央提出「一帶一路」同「大灣區」兩大國策之後,前任特首梁振英(CY)試過喺《施政報告》入面提咗成44次「一帶一路」,被人笑嗰份係《一帶一路施政報告》;而現任特首林鄭月娥第一份《報告》雖然冇咁誇,提咗33次,不過原來只係分咗啲重點去「大灣區」到咋!

 

 

秘書姐姐唯有叫大家睇返Aron佢哋手中嘅展示板,話呢個先係「最終版本」。

 

  既然「一帶一路」同「大灣區」咁重要,建制派當然都要日提夜提,得閒整啲研討會、論壇出嚟煲吓。就好似今日咋嘛,同工聯會有密切關係、兼由工聯會立法會議員郭偉強(Aron)做會長嘅香港青年協會,就整咗個「『粵港澳大灣區』青年就業意向問卷調查」嘅PC,又嚟講兩句「大灣區好嘢~真好嘢」喇!

 

對大灣區只能「樂觀」冇得「不樂觀」?

 

  呢個調查PC一開始就話,有超過八成人對大灣區就業前景感到「樂觀」或「非常樂觀」,但同時又有近六成(57.8%)人話唔考慮去大灣區做嘢,調查仲話,其實得三成幾受訪者對香港嘅就業環境感「樂觀」咋!

 

  咁多人對大灣區咁樂觀,又何解唔肯上去做嘢呢?協會就話係因為大家都「不清楚」大灣區發展計劃嘅詳情喎!之但係咁,協會話今次係收到878份有效問卷,不過喺派畀記者嘅新聞稿入面,列出咗「您對大灣區各大城市的就業前景是否持樂觀態度」嗰Part問卷結果出嚟,明明受訪者總數係寫「626人」噃!

 

秘書姐姐「救駕」失敗 郭偉強慘被跣一鑊

 

  Jenny同其他行家睇嚟睇去,都覺得個數字都怪怪地,問身為會長嘅Aron「點解嘅、點解嘅?」Aron望住個數頭上都好似彈咗幾個問號出嚟,一時之間口啞啞!呢個時候身後嘅秘書姐姐就試圖「救駕」,可惜係愈幫愈忙……佢解釋話個數字係錯咗,但係個百分比係啱嘅!小妹同其他行家就更加「黑人問號」,事關當個數字有變,個百分比梗係會隨之而變啦,小學生數學知識來噃!

 

  Aron似乎都覺得呢個答案更加怪,就同大家講稍後會再更新份新聞稿畀大家(但小妹到截稿都未收到新嘅新聞稿……)。

 

  搞唔掂點算?最後秘書姐姐唯有叫大家睇返Aron佢哋手中嘅展示板,話呢個先係「最終版本」,Jenny見到表示「樂觀」嘅百分比係56.1%、「非常樂觀」係18.5%,即係只有七成半受訪者覺得「樂觀」,而唔係一開始所講嘅超過八成,可憐Aron啱啱仲要拎住呢塊板,講有八成人話「樂觀」,咁就被Fake咗一鑊喇!

 

  之但係,就算七成半同八成,數字上雖相差唔遠,但聽落去個觀感亦有不同,Jenny見啲選項入面,只有「非常樂觀」、「樂觀」同「中立」,唔見有負面選項噃!再睇返塊板,明明圖表入面顯示「不樂觀」嘅只有0.5%,「非常不樂觀」仲係0%添!即係代表本身條問題有提供負面選項,但喺新聞稿就完全冇提到,到底今次係純粹失誤、定係有心做個靚數字出嚟呢?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多言歸政傳文章
你可能感興趣
#大灣區 #立法會 #選舉 #90後 #80後 #中國 #一帶一路
編輯推介
即時報價
全文搜索
Search
最近搜看
新型肺炎
The power of love
More
Share