加入最愛專欄  收藏文章 

2022-07-19Photo: 圖片由作者提供

終於中招了,哇哈哈!

  大家咪笑小弟阿Q精神,真㗎,有點點「慶幸」,終於中招了。

 

  整個疫情發生兩年幾,專家估計三百萬人中過招(大量冇報,怕被捉去隔離),喂!作為傳媒人,我完全冇經驗,咁咪好「冇面」?點知真正感覺噃!(係咪變態呢? )

 

  況且,打晒三針,再中埋招然後康復,免疫力更加強 (有科學根據㗎 )!

 

  上周四,約咗幾位傳媒人兄弟姊妹攪「煮酒論時局」飯聚,每次請一位在位掌權者,自由自在對時人時事時局分享看法,只是不准引述。過癮,大量新聞傳媒中冇曝光的消息紛紛爆出,又食飽又飲飽又聽飽。

 

  呢類聚會,參加者當日要手機群組中「騷」撩鼻報告,人人顯示一條線,大家安心出行。

 

  晚餐完畢,開開心心返家,睡去凌晨四點,咦, 乜喉嚨有點痕癢,感覺似作感冒,至清晨未退。

 

  直覺:中招!簡單,即做快測!從未試過,雙線!再做,又雙線!

 

  首先通知老友周五另一頓快樂晚飯改期。然後,未報衞生署前,先稟告老婆大人、肥女B及排骨B。

 

  佢地個個良好市民,百分百守法,立即開始將為夫為父「監禁」在房,唔准再踏出。然後,上報衞生署。

 

  嘩!效率快速,轉眼已收到「隔離令」,簽發的正是日日四點直播見到,有啲「怕羞仔」的衞生主任區家榮醫生。

 


政府服務周到,專人到你家送化驗袋,企在門外,直至你完成採樣。

 

  樣就「怕羞仔」,隔離令就極權威嚴肅:「本人有理由相信你曾智華受到2019冠狀病毒感染,本人命令你必須即時根據政府指示接受隔離,直至……你不得離開隔離地方……若未能遵守,即屬犯罪……可處第三級罰款及監禁六個月(嘩,好驚驚! )。如你已接種新冠疫苗兩劑或以上,在隔離的第六及第七天,進行快速測試,若連續兩天結果陰性……將視作完成隔離條件,隔離令完結,毋須通知衞生署(咦,原來可以自動放監 ) !

 

隔離令措詞嚴厲,搞到分分鐘會判坐監咁款,好驚驚。

其實,七天冇事就變回「自由人」。

 

  好嘞,疫情發展如何?

 

  確診後第一晚最辛苦,全晚標冷汗,成張被濕晒,毛巾仔亦抹咗半打。

 

  第二朝,並不太辛苦,生活也不悶,因為……哈哈哈,周六馬季最後一戰,食完早餐刨馬經,12點半開跑,根本對病情再冇感覺,因成個神經系統只得「馬馬馬」。

 

  晚飯後,睇咗半套期待已久的《Drive My Car》, 10點瞓着。咦,有點好轉嘞,再冇標冷汗,只幾聲咳。咁就有覺好瞓矣。凌晨三點紥醒,立即執筆寫下本文,速速交稿。

 

  監禁生涯,被房外三名「獄卒」嚴厲監管,要坐足最少六日。日日「必理痛」及「連花清瘟膠囊」交叉服用。最擔心,並非病情,而係被咁樣禁閉,冇地方運動,第七日出關,可能變「肥豬Luke」矣。

 


藥物多似零食,隨便享用。

如今講句笑,真係「好易中、好易買餐餸」。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

【全城爆炸「性」節目】《男男女女.嘉點情趣》由美女DJ及教授以客觀開放角度談性談愛、談情談趣。 ► 立即觀看

更多快樂退休文章
你可能感興趣
#退休 #隔離令 #新冠肺炎
編輯推介
即時報價
全文搜索
Search
最近搜看
大國博弈
貨幣攻略
More
Share