【晴報專訊】黃又南、蘇麗珊及顧定軒前晚出席電影《冥通銀行特約︰翻生爭霸戰》首映禮，原來三人最近不約而同搬屋，收拾期間才發現家中物品多得驚人。又南笑言沒想過儲了大堆「垃圾」，單是劇本也超過50本。

黃又南笑言最愛儲舊物，惟有努力工作搬大屋。

　　黃又南與蘇麗珊前晚大談搬屋的準備工夫，又南表示當日一拍完戲便立即搬屋，非常疲累：「因為要專心拍戲，所以搬屋之前，我一早講咗乜都唔理，點知淨係媽咪幫我執嘅物品，已經有120箱。」

　　又南笑指120箱個人物品中，有很多都「唔等使」：「咁多年嚟，我儲埋好多『垃圾』，我搵咗相熟嘅朋友幫我執屋，佢竟然喺我床下底搵到一箱劇本。因為我由自己第一套戲嘅劇本開始儲，儲到依家，大約有50幾本。所以都請教朋友點樣防蟲同保存，自己嘅唱片當然都有儲，所以希望繼續努力做嘢，將來搬間大啲嘅屋擺嘢。」

蘇麗珊情信斷捨離

蘇麗珊不會留戀前度的物品。

　　同場的蘇麗珊近日亦與又南一樣，翻出放在床底的一箱劇本，她笑言執屋時，用了20個紅白藍膠袋裝起私人物品。她說：「我要斷捨離好多嘢，好多都好有回憶，但其實好少翻睇。最唔捨得係朋友送嘅明信片，全部都係朋友嘅心意，單係明信片都有幾箱。」至於以往收過的情書會如何處置？她即笑說：「呢啲過咗去就掉啦！」而顧定軒早前搬屋，翻出在演藝學院就讀時的筆記，令他很感觸：「不過嫲嫲成日投訴我唔肯掉舊嘢。」

轉載自: 晴報

etnet榮獲HKEX Awards 2023 「最佳表現證券數據供應商」大獎► 了解詳情