收藏文章 

2017-08-31

「白宮發言人」馮煒光即將進軍財演界?

  話咁快聽日就係開學日一眾前朝官員就唔使開學,但就有新工返喇!Jenny喺政府換屆時都同大家有八過吓嗰班已經離開政府嘅前高官、專員、顧問等等,日後嘅「生涯規劃」係點。據Jenny所知經常成為傳媒焦點嘅「白宮發言人」馮煒光聽日開始做財務顧問,仲話要寫書做作家;前發展局局長馬紹祥呢,竟然走咗去搞創科?

 

 


馮煒光又有新搞作「關公」可以抖抖先?
 
  大家應仲記得最高民望嘅前食衛局局長高醫生會返去老本行,做返私人執業;而前財庫局局長陳家強就去咗大學教書。而「白宮發言人」馮煒光,之前就話去完北韓後,就會開間公關公司做老細喎!不過,製造過唔少「關公災難」之後,Jenny聽聞PR界對馮生打算開新公司都唔太睇好。無怪乎,而家仲未有聲氣啦!老細真係唔係想做就做到


  Jenny
今日就收到一份政府文件,入面就寫滿晒前朝官員嘅日後去向。一如早前所料,大家都冇咩懸念咁開展咗新生喇!Jenny仲昅到「白宮發言人」馮生嘅最新動向,原來唔係做「關公老細」,而係聽日開始就會成為一位自僱嘅「財務顧問」喇噃!雖然「財務顧問」定義好闊,但放心,佢似乎唔係去做上電視嘅「財演」,據馮生向政府申報嘅資料,佢係將會去Sell保險嘅。


  除此之外,其實馮生好忙㗎,佢已經應承咗101日開始去周融搞嘅網媒HKG報到做自由身評論員,仲做埋作家準備出書講97前英殖時期嘅香港,睇嚟真係好唔得閒,計Jenny話,馮生你百足咁多爪,記得分配好時間呀!咁「關公」就可抖抖喇



馬紹祥科學園做顧問 再遇同事好Happy



  除咗馮生有啲新消息畀我哋之外,前發展局局長馬紹祥就放埋呢幾日假,下個星期一就Ready去科學園做顧問,仲會負責埋河套區個創新及科技園項目添,佢主要職責就係提供下發展策略呀,幫下計劃執行咁!咁啱今日特首林鄭去深圳訪問,又係咁提起呢壇野。睇嚟馬前局長離開咗金鐘都仲係心繫政府噃,第時返工同政府開會撞口撞面都係舊同事,成件事都幾Happy吖!

 

  而之前喺中央政策組做全職顧問嘅王卓祺教授就會返中大做研究,都叫做做返老本行。其實本身大家都對佢唔係好熟,對佢寫嘅文章就可能熟啲,佢而家又再匿返去研究所入面,睇嚟都幾難見到大家喇!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多言歸政傳文章
你可能感興趣
#馮煒光 #馬紹祥 #王卓祺 #發展局 #關公災難 #科學園 #創新及科技園 #周融 #英殖 #作家
編輯推介
即時報價
全文搜索
Search
最近搜看
25周年慶
More
Share