港區人大代表選舉上個星期五(17日)就開始接受提名，雖然係話代表香港人民，不過Jenny同大部份香港人一樣，都係冇份提名亦冇份揀！唯一可以做嘅就係，同大家一齊八吓有咩人去選，同埋「祝福名單」啦！

 

郭醫生成為今次第一個舉手話選人大嘅民主派。

 

「祝福」名單有40個　總有4個冇得玩喎！

 

　　其實早喺提名期未開始之前，已經有唔少建制中人同埋富二代蠢蠢欲動，全部都有名有姓，係大家耳熟能詳嘅名字。例如由政協轉戰人大嘅民建聯前主席譚耀宗、前政制及內地事務局局長譚志源、律師會前會長林新強、佔領運動嗰陣代表小巴大佬申請禁制令嘅大狀陳曼琪等等，據聞當中已經唔少獲得「祝福」添！不過有「祝福」唔等於sure win，位就得36個，但係而家流傳出嚟嘅名單就多過40個，即係話，總有幾個人會一場歡喜一場空！

 

郭家麒要參選　講明唔簽聲明

 

　　隔咗短短嘅一個周末，今日民主派都有消息喇噃！就係公民黨嘅郭家麒宣布參選喇！郭醫生話，民主派喺2000個選委佔300個，要拎到10個提名嘅門檻唔難，但係要贏得一席，或者「造王」就應該冇咩可能，而且自己唔會簽擁護憲法嘅聲明，都預咗係選唔到㗎啦！

 

　　郭醫生都好坦白咁同Jenny講，參加嘅目的都係為咗市民睇到呢個選舉唔公平嘅現象。佢仲話，就算係建制派嘅人，如果唔喺「祝福名單」入邊，都係一樣冇得做㗎，但唔代表自己要自動放棄個機會嘅！佢仲同Jenny透露，未來有「有個位數」嘅民主派人士會參選，但一講完就封口，死都都唔肯講多啲！

 

民主派唔嫁又嫁？定冇溝通咋！

 

　　之不過……Jenny記得明明上個星期民主黨阿碧雲姨先同小妹講過，民主派唔會派人參選，點解郭醫生今次又會走出嚟話選嘅？知郭醫生聽完個問題，即時反應就同Jenny講:「佢都冇問過我！」郭醫生答得咁快，睇嚟又唔似講假喎！睇嚟今次民主派爭咁啲溝通喇！唉！

 

　　講時講，有咩人已經交咗表呢？Jenny就記得上星期五就已經有5個人交咗表，分別係爭取連任的黃友嘉、雷添良同埋張明敏，仲有兩個新面孔陳曼琪同埋經民聯張俊勇都交埋。兩位新人咁快就儲夠提名，睇嚟真係有啲「祝福」咁噃！

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情