收藏文章 

2018-01-18

阿Bill雙重黨籍夠疊馬 周庭人丁單薄晒日文

  Jenny噚日去完民建聯(民記)嘅指定九西候選人鄭泳舜個造勢大會,又點少得仲有新東嘅鄧家彪(阿Bill)個大會呢!一如所料撐場人士都係粒粒皆星。反觀同日報名嘅「學民女神」香港眾志周庭,人丁真係單薄到一個點……

 

 

陸頌雄(右):「我哋喺(立法會)十樓等緊你」。Jenny聽完即刻起晒雞皮......

 

雙重黨籍 Double人馬

 

  嗱!噚日舜仔就有前財庫局局長陳家強站台,今日Jenny都見到阿Bill有前保安局局長黎棟國,拍住前商經局局長蘇錦樑嚟撐場!唔止添呀,阿Bill拎住工聯會同民建聯雙重黨籍,兩黨梗係唔可以唔派人嚟啦!你睇,工聯會會長林淑儀、榮譽會長陳婉嫻、前民建聯主席譚耀宗同現任副主席陳勇、工聯會立法會議員陸頌雄和何啟明等都有嚟㗎!

 

  今日阿Bill係喺沙田鄉事委員會搞造勢大會,喺得呢到搞,除咗前高官同前同事,就梗係仲有一大班鄉紳出嚟「晒冷」啦!Jenny仲見到唔少公公婆婆添!而一眾星級嘉賓講完嘢之後,終於到主角阿Bill出場嘅時間,主持人唔知係唔係臨時爆肚,諗住大家咁熟唔使介紹喇,就問大家:「等緊邊個發言呀?」但係竟然冇人接到,現場頃刻竟鴉雀無聲,連Jenny身旁嗰位好興奮、一直嗌住口號嘅婆婆都反應唔切,主持人Feel到有陣Dead Air,嗱嗱臨問多次,好彩今次有人反應到喇,大嗌「阿Bill!」先落到台咋!

 

民記冇影唔緊要 工記巴打錫返

 

  其實噚日Jenny收到採訪通知嘅時候,上面係寫住有民建聯(民記)、新民黨之類嘅新東立法會議員出席㗎!點解今日得返佢哋工記議員陸頌雄同何啟明出現嘅?其他前立法會同事去晒邊?作為民記代表之一嘅譚耀宗(譚Sir)就同大家講,其實係因為今日立法會要開會,咁建制派好盡忠職守㗎嘛,寧願喺會議廳坐到瞓著都要防止流會,所以今日就派咗佢同陳勇做代表撐阿Bill場囉!不過譚Sir,你咁講法,咁到底陸頌雄同何啟明係唔盡忠職守呀,定係已經唔係建制派啦……?

 

日本電視台追訪 周庭即場晒日文

 

  相比之下,同一日報名嘅「學民女神」香港眾志周庭就冇咁人強馬壯喇!傍住佢去報名又叫得出名嘅只得被DQ咗嘅羅冠聰一個。佢對手陳家珮(Judy)之前受訪講英文講到一舊舊畀網民笑,本來Jenny都期待周庭都晒返兩句英文,等英文台行家好交差,點知今日英文媒體竟然冇人過來,但就嚟咗日本媒體,分別係朝日新聞同埋東京電視台,周庭仲即場用好流利嘅日文答問題。雖然Jenny日文係「有限公司」,唔知佢文法有冇錯,不過見日本行家點晒頭又一臉滿意咁,應該好過聽Judy講英文嘅……

 

周庭話自己已經完成放棄英籍,又簽埋確認書,應該可以成功成為港島區補選嘅候選人。

 

  另一方面,爭啲唔記得講,前人民力量成員、2012年立法會選舉幫過白韻琹(白姐姐)助選嘅「維園阿哥」任亮憲,就話聽日開記者會,到時就會宣布以獨立候選人身分參選港島區補選。就等Jenny去睇吓佢搞邊科先!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

全新直播節目《hot talk 1點鐘》強勁嘉賓陣容 擴視野 添智慧 玩埋「睇住賞」 贏熱爆獎品 ► 即睇

更多言歸政傳文章
你可能感興趣
#立法會 #本土 #80後 #90後 #選舉 #雙重黨籍 #九龍東 #鄧家彪 #周庭 #港島 #立會補選 #日文能力 #英籍 #英文能力 #學民女神
編輯推介
即時報價
全文搜索
Search
最近搜看
大國博弈
新型肺炎
More
Share