收藏文章 

2018-04-18

有汗出冇糧出?行管會終於做返個「正常決定」

  今日Jenny同大家玩個Role Play先!首先當自己係一個打工仔(可能都唔使當),返咗幾個月工,有日老細叫你入房,遞咗個大信封畀你,話因為你喺簽約嗰陣唔夠真誠,所以而家就炒你魷魚,兼要你嘔返早幾個月嘅人工出嚟。唔知大家喺呢個情景之下會點做呢?

 

 

劉小麗、梁國雄(長毛)同羅冠聰都覺得,當初咁突然DQ佢哋,令佢哋議員辦公室啲員工都要終止合約,認為立法會應該承擔佢哋嘅代通知金同遣散費喎!

 

有汗出冇糧出 你得唔得?

 

  可能有讀者會質疑:「邊有可能呀」!不過原來呢樣嘢喺現實世界真係有發生,仲要係發生喺我哋高高在上嘅立法會添!講緊嘅就係之前立法會行管會話要追返被取消議員資格嘅4個前議員梁國雄、劉小麗、羅冠聰同姚松炎(DQ 4)所有嘅薪津,但係佢哋本身已經做咗幾個月嘢,被人質疑係「有汗出,冇糧出」,有意見亦都話,從來未見過有公司炒人,係要人嘔返晒之前嘅人工出嚟!

 

  件事傾咗咁耐,之前政府又覆過行管會可以考慮撇帳,嗰時大家都覺得DQ4可以甩難!今日行管會終於都有決定喇!果不其然,就係話聽咗法律意見之後,都係唔追全數薪津喇!因為追討薪津所涉及嘅公帑要成8位數,不過預支咗嘅款項就點都要追,涉及19至31萬到啦,同原本由214萬至313萬個數差成10倍!DQ4亦唔使申請破產喇!

 

大和解?你就想!

 

  今次「放生」DQ4,係唔係政府想伸橄欖枝修補下撕裂咁呢?本身係立法會行管會成員嘅郭榮鏗就同Jenny講,並唔係「橄唔橄欖枝」嘅問題,佢覺得唔可以話係釋出善意,認為政府今次行使酎情權去撇帳,係合理嘅態度,皆因追討薪酬法律理據好薄弱,一旦打官政府真心冇咩勝算!

 

  至於呢個決定幾位當事人都話接受嘅,不過劉小麗、梁國雄(長毛)同羅冠聰都覺得,當初咁突然DQ佢哋,令佢哋議員辦公室啲員工都要終止合約,認為立法會應該承擔佢哋嘅代通知金同遣散費喎!劉小麗仲話,唔覺得政府咁做係釋出善意,只不過係喺合約精神下嘅正常做法。Jenny都覺得,呢4位前議員又真係有喺做緊議員期間履行佢哋嘅職責,開會、審議議案同跟進議題,唔同早前青年新政梁頌恆、游蕙禎咁未開始做嘢就被人拒於門外,所以呢個決定都尚算合理,大家又覺得啱唔啱呢?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多言歸政傳文章
你可能感興趣
#立法會 #選舉 #宣誓風波 #行管會 #DQ #追討薪津 #有汗出冇糧出 #劉小麗 #羅冠聰 #梁國雄
編輯推介
即時報價
全文搜索
Search
最近搜看
新型肺炎
More
Share