每逢放榜季節，Jenny都會見到唔少傳媒訪問文憑試狀元，例行都會問佢哋嘅理想係乜，答醫生、律師是常識吧！又有前途又有「錢途」！今日Jenny就去咗美荷樓，聽中大前校長沈祖堯門生、中大醫學院院長陳家亮（Francis）教授分享奮鬥史，席間Francis就食咗誠實豆沙包，好坦白咁話以前揀讀醫最初其實係睇中「錢途」，為咗可以「向上流」！

 

 

Francis睇上仲好後生完全唔似50幾歲!

 

屋邨仔奮力上流 終成大國手

 

　　原來Francis以前係住喺牛頭角邨，間屋又逼又細，每晚都要開帆布床訓覺，朝桁晚拆；本身細個嗰時考到九龍塘嘅一間名牌小學，但係屋企礙於去讀就要每個月畀8蚊校巴費，所以最後都係要佢去觀塘一間普通嘅小學讀書。

 

　　所以小小年紀嘅Francis好想成為醫生，其中一個主因就係可以幫屋企人改善生活環境。佢仲勉勵聽講座嘅同學仔，一定要搵到自己想做嘅嘢，先至有動力去做，而佢當時想改善居住環境、向上流動，成為咗佢讀醫時嘅動力喇！

 

唔泊「好碼頭」李國章 揀默默無聞沈祖堯

 

　　不過想當年，如果想讀醫，原來港大先至係大家趨之若騖嘅地方，點解Francis會揀咗中大呢？Francis就話，原來佢份人係「包拗頸」，當年中大醫學院係新成立，佢就覺得係一個可以發揮到自己創意嘅地方，所以就算當年被校長召見，問佢點解唔去港大，佢都冇理到！咁先遇到佢嘅恩師沈祖堯咋！

 

　　Francis仲講笑咁講話，當年沈教授仲係好年輕，係醫學院入面「最無權無勢」嘅醫生，當時大家都覺得外科前途最好，想泊李國章呢個「好碼頭」，Francis自己亦都係外科嘅成績名列前茅，但係佢反而覺得跟沈祖堯先可以有發揮空間，所以就揀咗腸胃科喇！

 

「不只為賺錢，更重要係幫到人」

 

　　喺沈教授教導之下，佢學識做醫生唔係只係為賺錢，更重要係幫到人。所以而家佢就係秉持住「如果我可以教好10個學生，每個又可以教好10個學生，咁就可以培訓幾何級數嘅醫生出嚟」呢個信念去教書。Jenny睇到Francis樣樣嘢都揀最難嗰條路嚟行，難怪佢話自己好似「大衛與歌利亞」故事入面嘅大衛啦！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情