加入最愛專欄  收藏文章 

2020-07-23

《Online有話兒》股神是大智若愚?抑或是……

  美股近期似乎已經消化疫情嘅負面因素,納指更係屢屢破頂!之不過,「股神」巴菲特好早之前已經係咁出貨,到呢次反彈時連條「牛尾」都捉唔到。

 

究竟股神賣弄緊咩關子呢?(Shutterstock圖片)


  
今年首季損失四千幾億,巴郡跑輸標指

 

(Shutterstock圖片)


  
  今年巴郡首季損失超過550億美金(約4290億港元),主要因受到金融股同航空股影響;疫情底下,呢類股份「低處未算低」,所以股神狠狠斬攬,將航空股徹底沽出。但股神算不如天算,航空股3月底絕地反擊,股神完全錯失晒個升浪。


  有人統計過,截至目前為止,五大股份市值嘅輸家包括摩通、富國、美銀、埃克森美孚同埋巴郡,而巴郡市值萎縮高達900億美元,巴郡A股價年初至今已經輸緊一成半,跑輸埋標普500指數;相反特斯拉年初至今已經暴漲三倍,真係有人歡喜有人愁囉!



有人笑股神「笨蛋」,有人話股神「扮豬食老虎」!

 


  股神係扮豬食老虎,定係真喺豬咗呢?(Shutterstock圖片)
  

  股神一舉手一投足都惹來市場熱話,例如今年6月初Barstool Sport創辦人Dave Portnoy就笑股神係「蠢材」(idiot);而資產管理機構Fisher Investments創辦人Ken Fisher就話股神年紀大啦,所以唔敢冒險啦,所以情願喺呢次疫情下靜觀其變。


  股神被揶揄,信徒梗係立即出嚟護航!「Farnam Street」嘅股神死忠Shane Parrish接受傳媒訪問時就反擊啦:「股神其實只係扮蠢,所以先可以有好好嘅長期投資效果,由於未來不穩因素愈來愈多,所以股神其實為緊未來做準備。」


  唔通真係「扮豬食老虎?」



手握萬億現金,仍持蘋果股份

 

(Shutterstock圖片)



  事實上,今年係巴郡手持現金最多嘅一年,總計高達1372億美金(約10701﹒6萬億港元)。有人笑佢唔敢出手,但有人就話其實個市只係「假彈」,巴老儲定咁多銀彈,係等大跌市時候預備再掃平貨,係真係假真係得佢自己至知。


  不過巴郡亦唔係「一股不留」嘅!其實公司仲持有大量蘋果股份,佔目前巴郡手持所有股份入面嘅四成,仲係蘋果第二大股東添!自今年3月美股低點以來計算,呢批蘋果股份就已經穩賺400億美金(約3120億港元)!


  正所謂未打到最後都唔知邊個贏,今年仲有五個幾月,可能一個屈尾十贏返轉頭都唔定,唔係咩叫「股神」啊!

 

撰文:李皆穎

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

現凡訂閱etnet YouTube Channel,即賞麥當勞現金券!
► 立即行動

更多Online有話兒文章
你可能感興趣
#理財 #股神 #巴菲特 #美股 #巴郡
編輯推介
即時報價
全文搜索
Search
最近搜看
監管風暴
疫苗福利
More
Share