政府部門成日畀人話耍太極，Jenny都唔係第一次聽，亦親身經歷過唔知幾多次。所以平時好鍾意追睇港台製作講申訴專員公署點樣調查啲投訴個案嘅劇，有時都好大快人心！今日咁啱Jenny就去咗申訴專員公署嘅調查報告記者會，小妹梗係要留意吓有咩故仔先！

 

 

驗菜等足19日 中招實行痾到瘦

 

　　香港人面對最大的問題，相信唔係住就係食。所以今次公署份報告入面嘅Case都係呢兩瓣。首先講吓主動調查嗰Part先，即係冇人投訴但係署方覺得好有問題嘅做法，就係食環署對進口蔬果安全監控制度！

 

　　原來而家從內地供港嘅蔬果貨車，唔係架架都會抽驗;就算驗都係拎近近哋，櫃門旁嗰啲嚟驗，即係有問題嘅蔬果放入些少就可以瞞天過海;連海路入口嘅蔬果亦都唔係恒常抽檢！就算係驗，一般情況之下竟然仲要等19個工作天，計埋星期六、日即係差唔多成個月，先知係唔係毒菜毒果！Jenny心諗，等個檢驗結果出到嚟，大家應該咩都食完消化晒喇！有咩事就醫院見啦。

 

　　呢個「隨機」檢驗制度咁隨便，Jenny聽完真係O咗咀，喂！仲應唔應該食菜Keep Fit好呢？定食多啲，中咗毒就唔慌唔痾到瘦？

 

　　另一份就係投訴個案，Jenny最有興趣就係呢一Part！今次個投訴就係關於社署同房署。房署雖然係被人投訴得最多次嘅政府部門前三甲，但係申訴專員劉燕卿就話今次個案其實唔關房署事噃！

 

申訴專員斥社署拘泥程序要求

 

　　個故事是咁的：投訴人一家四口住緊某公屋，其間有家人於單位內突然身故，另一家庭成員因目睹事件而受情緒困擾，如果住返原本嘅單位心理就好大影響，所以2014年向房署申同邨調遷，房署轉介社署評估之後就調佢哋一家四口去同邨唔同間隔嘅單位。但由於新單位同舊單位都仲係好似樣，投訴人都仲擔心屋企人會不安，所以拒絕接受。房署就向社署服務中心要求提供協助，點知中心就話評估同推薦都重複咗，所以唔再跟進。投訴人等足兩年都冇人理，所以決定向申訴專員公署投訴呢兩個部門。

 

　　Jenny聽聽吓，覺得簡單啲講，就係你又唔問清楚，佢又唔肯行多步囉！而專員就話，房署無拖延處理不過就冇確認申請人個要求；反而係社署同埋服務中心處理申請時就拘泥喺程序要求，專員仲話社署同服務中心今次係「鐵板一塊」、「畫地為牢」，幫唔到投訴人一家！

 

林鄭「管治新風格」幫到手嗎？

 

　　其實都係㗎，Jenny相信大家都試過去政府部門遞交申請，都見識過唔同部門嘅「程序」運作。呢種投訴，Jenny都同劉專員諗嘅一樣:「唔會排除係冰山一角囉！」之不過，次次申訴專員公署調查完之後，都會畀返啲建議出嚟，但係政府會唔會做同幾時去做，就唔敢寫包單喇！所以Jenny一直都好期待林鄭上咗場之後嘅「管治新風格」㗎！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情