噚日立法會《廣深港高鐵（一地兩檢）條例草案》委員會歷史性地流會「鳥」！是咁的，原本噚日下午兩點本身要開會，不過打晒鐘點晒名，會議室都只係得20個議員，離法定人數仲差一個，會就係咁流咗喇。喔噢！

 

流會究竟邊個錯？建制甩底有6個

 

　　無啦啦流咗會，身為主席、又係行政會議成員嘅葉劉就梗係嬲嬲豬啦！宣布流會之後，佢就同副主席、同樣係行政會議成員嘅張國鈞出嚟扑咪，仲開名鬧３個泛民議員陳淑莊（Tanya）、梁耀忠同毛孟靜喺門口都唔入去；同樣「很想要」「一地兩檢」嘅建制派亦都大鬧泛民唔肯開會。只不過睇返記錄，原來建制派自己都有6個應承會出席呢次會議嘅議員唔見咗人，大家真係要記住1隻手指指住人哋嗰時，有4隻手指都係指住自己呢個道理喇！

 

葉劉趕Deadline 高鐵竟出軌

 

　　會唔流都流咗喇，唔知葉劉係唔係驚趕唔到進度，會衰畀「妹妹」林鄭睇呢？所以佢噚日喺咪兜一講完「唔排除星期日都要加開會議」，轉頭就即刻出埋Email，叫各位議員星期五之前要答覆出唔出席到星期日個會！Jenny今日望咗吓個立法會日程，都見到寫咗星期日係要加會添！咁心急，真係好難唔令人聯想到葉劉喺度趕Deadline噃！

 

　　一邊廂政府繼續落力宣傳，話高鐵已經搞掂99%，星期日仲已經開始咗試行；另一邊廂委員會開會都如火如荼，你流會我就即刻加會。高鐵開通似乎萬事俱備……點知就喺噚日凌晨爆出新狀況！高鐵一列停泊喺維修車庫嘅列車，尾卡部分車輪偏離咗路軌，聽講尾卡有兩個承託架，每個承託架有8個車輪，當中有4個車輪出咗軌，列車呈「擺側」狀態，有可能係列車駛入車廠時要「彎彎地入」，因為「擺尾」引致出軌。Jenny都不禁心裡暗叫：哎！喲！喲！

 

佛系「一地兩檢」

 

　　雖然事件冇人受傷，但係作為「一地兩檢關注組」召集人嘅Tanya一聽到呢個消息就O晒嘴，大呼「匪夷所思」。佢話，成條高鐵路軌嘅彎位多不勝數，如果「彎彎地入」列車就會出軌，咁嘅質素又叫人點接受呢？

 

　　不過Tanya，政府個「目標」已經講咗十九幾萬次，就係要9月通車齊齊搭高鐵上北京，Jenny心諗大吉利是再有咩事（最好係咩事都冇！），根據政府嘅「佛系『一地兩檢』」做法：唔跟進、唔解決、唔做公眾諮詢、唔理反對聲音，緣份一到，自然暑假前就會過到。至於你信不信，反正我信了！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇