葉劉當年一句：「如果我連髮型都捍衛唔到，又點捍衛香港治安？」傳頌至今。相信立法會體育、演藝、文化及出版界議員馬逢國應該深受啟發！話說佢為咗保護「可以保護佢個髮型」嘅造型啫喱（Hair Gel），不惜同機場職員爭論，仲「撻」埋立法會議員嘅朵出嚟，最後終於「搶閘成功」！不過為咗可以Hand Carry呢支唔夠200ml嘅Hair Gel上機搞咁多嘢，值得咩？

 

 

 

源自100ml的爭議

 

　　馬議員今日都現身解說，話當時係因為支Hair Gel只係「用剩少少」，應該唔夠100ml嘅！不過因為支Hair Gel嘅本身容量係200ml，所以就唔畀佢拎上機。佢覺得唔應該係咁計，所以就同職員理論理論，當中係有講過佢議員身份，亦有要求更高職級嘅人員出嚟同佢講。

 

　　等Jenny同大家溫習機場規定啦！嗱！係咁寫嘅：「所有放置於手提行李的液體、凝膠及噴霧類物品均須以容量不超過100毫升的容器盛載，並放在一個容量不超過一公升、可重複密封的透明塑膠袋內，每名旅客只可攜帶一個裝有容器的透明塑膠袋。」睇嚟馬議員以為100毫升係講啲液體，但係其實機場所指係容器嘅容量啊！

 

 

 

譚文豪趁機明串：不如唧晒上個頭啦！

 

　　而本身都係民航機師嘅公民黨譚文豪就話馬議員咁做，同前特首CY「行李門」事件如出一轍：「明顯係特權啦！係唔係個個都可以好似佢咁先？」仲趁機出盡力笑馬議員：「咁緊張支Gel，不如唧晒上個頭啦！」有指馬議員仲諗住選調查許智峯搶手機事件嘅委員會主席，譚文豪一聽一於食住上，加多兩錢肉緊串馬議員，「佢都係唔好查許智峯喇，搽Gel啦！」

 

　　其實，Hair Gel呢啲咁普通嘅嘢，去到當地先買都一樣得嘅啫！Jenny去旅行都係咁啦！馬議員想響應環保唔想浪費資源嘅話!Jenny有好計，不如就學吓黃錦星局長個「髮型」吧！一次過搞掂，又唔使洗，又唔使Gel，Fit晒！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇