收藏文章 

2019-01-31

十大消費新聞實名制趕絕「黃牛」大快人心 「飯腳Karen」竟然冇份?

  臨近歲晚,各大機構都公布上年嘅年結數字,Jenny就好好奇消委會今日公布嘅「狗年十大消費新聞」,有邊單會榜上有名喇!

 

 

實名制趕絕「黃牛」大快人心

 

  睇吓先,原來網民同Jenny一樣咁痛恨「黃牛」,票選最關心嘅消費新聞第一位,就係「黃牛黨問題備受社會關注,康文署將試驗實名制購票」!有3751票咁多!而第二同第三名,就分別係關於「轉數快」嘅個人私隱風險,同埋國泰失940萬名乘客資料事件。其中國泰呢單仲成為「最離譜」消費新聞;而有關黃牛飛嘅「黃子華及劉德華的演出門票炒賣至逾萬元,政府考慮修例將炒賣門票活動刑事化」,就成為「最大快人心」新聞喇!「雙華」魅力真係沒法擋呀!

 

  一講起消費新聞,Jenny第一時間就諗起「飯腳Karen」!就係之前有樓上咖啡廳請咗啲「美女」自拍靚相放上交友APP,扮識朋友實為做媒,拉啲新識嘅男性上去咖啡廳消費,再從中抽佣,其中一個被傳媒拍到嘅女仔就叫Karen,真人同上鏡……可謂天淵之別。Jenny諗咗陣就知點解消費新聞冇Karen份,因為呢單Case似乎係違反商品說明條例,應該報海關。

 

同胞愛打針 搞到消委會勁接投訴

 

  除咗公布十大消費新聞,消委會今日都公布埋上年嘅投訴情況,原來上年嘅整體投訴數字就有回升噃!消委會主席林定國話,今年投訴數字係自2014年之後首次回升,升幅主要係因為疫苗投訴大幅飆升所引起,其中超過九成投訴都係來自內地旅客嘅添!原來係因為上年子宮頸癌疫苗供不應求,有提供注射服務嘅商戶,喺消費者畀晒全數後但未完成服務,所以廣大的同胞們就梗係不滿要投訴啦!點解唔返祖國打?望望祖國嘅疫苗風波,你懂的……

 

  話說回來,Jenny就覺得今年影響最大嘅消費新聞,應該係港鐵沙中線一系列嘅醜聞先啱!皆因香港人作為消費者,日日搭咁多次車,計落都有份去起呢條沙中線㗎嘛,第時又係用家!點知到而家鑊鑊新鮮鑊鑊甘,仲要運房局局長陳帆都話唔知幾時可以通車,Jenny作為其中一個消費者都好想向消委會投訴吖!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多言歸政傳文章
你可能感興趣
#消委會報告 #十大消費新聞 #黃牛 #實名制 #子宮頸癌疫苗 #疫苗風波 #沙中線
編輯推介
即時報價
全文搜索
Search
最近搜看
25周年慶
More
Share