收藏文章 

2019-01-29

「議事廳狼人」Card Game 你玩過未?鄺神邱比特笑爆咀!

  聽日就係年宵開鑼嘅日子喇!Jenny知道每年年宵各大政黨都會趁呢個時候擺檔,又可以宣傳又可以籌款,仲唔一次過滿足兩個願望!而今日民主黨就率先同傳媒Share吓今年年宵嘅主打產品,原來係一眾後生仔都好鍾意玩嘅「狼人」 Card Game!

 

 

 

本來上年出 何解今年先賣?

 

  呢款由民主黨自家繪製嘅「議事廳狼人」,其實係為諷刺DQ事件而製嘅!民主黨副主席羅健熙就話,本身呢副牌喺上年已經設計好,不過因為正值311補選,所以就冇推出,仲借咗個場畀當時參選嘅民主派候選人宣傳。而創意媒體部部長黎敬瑋就講笑咁話,雖然過咗一年,但啲角色都仲未過時,都唔知係好彩定唔好彩喇!

 

  黎敬瑋又話,咁多個角色入面,而家睇返最大出入嘅應該就係律政司司長鄭若驊喇!事關想當年(即係上年)佢啱啱上任嗰陣,講嘢、回應傳媒時都係口窒窒咁,答咩問題都係「我冇補充」,所以就設計咗個「口吃的律政司」畀佢;點知一年過後,佢出嚟見傳媒又手指指又「口齒伶俐」,真係「有少少失策」吖!

 

 

 

政治人物化身成啜核角色

 

  睇返副牌,其實同傳統「狼人」玩法差唔多,不過就用咗唔同政治人物去扮演,同埋多咗啲自創角色。按照返民主黨嘅政治立場,作為「DQ刀手」嘅特首林鄭、前特首梁振英、大主席梁君彥,加埋建制派一姐李慧琼(琼子),就梗係「狼人」啦!「狐狸」就係做咗行會成員嘅前公民黨成員湯家驊;而劉夢熊(Dream Bear)就化身爆大鑊嘅「熊」!仲有兩個隱藏角色添,至於係邊個?Jenny就唔方便喺度講喇……

 

  而民主黨成員同埋其他政治人物,有唔少都化身成啜核角色!好似「邱比特」就由MK愛情文學大亨鄺俊宇擔任;曾經喺區議會選舉化身「捉鼠貓女郎」嘅黃碧雲,今次都一樣以「貓女俠」身份登場;不過其中扮演「守衛」嘅就唔只一個人,而係「堅輝廷」三個人噃!「堅」應該就係尹兆堅、「廷」就應該係林卓廷(阿廷),咁「輝」係邊個呢?

 

  Jenny睇咗一陣先認得出,原來係阿廷個老友、之前捲入退黨風波嘅莊榮輝!對比起「堅廷」二人,莊榮輝就比較生面口,今次設計搵兩個立法會議員夾住佢,畀佢企正中間,睇嚟有弦外之音噃!

 

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
更多言歸政傳文章
你可能感興趣
#特首 #立法會 #選舉 #議事廳狼人 #DQ #年宵 #民主黨
編輯推介
即時報價
全文搜索
Search
最近搜看
25周年慶
More
Share