加入最愛專欄  收藏文章 

2020-12-10

【未來辦公室】職場新常態由「轉變」到「成型」,公司如何改革才能接軌?

  新常態嘅出現,好多公司今年都不停進行內/外大改革。而家正正處於新常態轉變嘅初期,大多公司主要先集中改革生意模式,如將銷售轉做網購、生意變做電子化、多用online宣傳平台等等。但因為新常態由「轉變」到「成型」呢個過程,會不停出現變化,喺摸索階段總會有成有敗。不論生意改革如何,好多公司都會忽略咗內部嘅改革,長遠就未能同巿場接軌。

 

  疫情下好多公司會盡量安排同事work from home,就算疫情完結後,呢個工作模式極可能會繼續,office就會慢慢變成Hot Desk工作間。Hot Desk工作間同現時Share Office有點相似,兩者分別在於Share Office係同其他公司共享工作間,而公司Hot Desk就係自己同事共享。喺Hot Desk嘅模式下,員工唔會再有固定座位,取而代之會變成流動座位。員工每日返工坐嘅位置都會唔一樣,工作枱上嘅電話將會變成電腦電話。亦因為Hot Desk嘅特性,員工未必需要日日返公司工作,公司甚至可以改為租用更細嘅地方,再安排員工一星期有一至兩日WFH,減少對座位同其他資源嘅需求。如果安排恰當,最後能夠為公司慳錢,亦能打造新一代嘅辦公室環境。

 

  Hot Desk雖然可以慳錢慳位,但亦有利有弊,未必個個老細都接受到、間間公司都實行到。老細經常見唔到員工喺公司工作,某程度上係會令人缺乏安全感。另一方面,員工冇自己一個實實在在屬於自己嘅私人空間,歸屬感同時間亦會降低,間接影響員工對公司嘅信任度,所以公司必定要多方面配合,先可以實行長期WFH同Hot Desk嘅模式。

 

  Hot Desk/WFH模式慢慢盛行後,員工會開始變得更個人化,同時間Share Staff嘅概念亦會掀起,令員工更自主化。兩年前喺專欄內提及過Share Staff,該概念已經有外國公司開始推行。Share Staff意思係,好多員工其實擁有多過一種嘅工作技能,尤其係現今社會,唔難見到一人身兼多職,例如同事Peter除咗係公司Marketing部門嘅Assistant Manager,但同時間亦係一間小網店店主同part time婚禮司儀。因為員工更自主化,未來公司同員工嘅關係會有所改變,會由「僱主/僱員」變成「合作」,公司會允許員工有副業,甚至唔一定要員工硬性上班,只需準時完成工作,「辦公室」同「返工時數」已經不再重要。公司亦可以因應呢個模式而合理地減低工資,建立雙贏局面。

 

  新世代嘅來臨,到新世代成形,由公司工作環境、員工角色,到公司結構,都會大大轉變。公司不能只改變生意模式而忽略改變公司內部,因而失去背後最強嘅backup。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

更多我做Marketing文章
你可能感興趣
#職場 #新常態 #Work from home #Hot Desk #Share Office #Share Staff #公司 #老闆 #打工仔 #改革 #未來辦公室
編輯推介
即時報價
全文搜索
Search
最近搜看
中概股回歸
新型肺炎
More
Share