上周「腫瘤驚魂」出街，一如預期， N人好奇/問候。亦有個別開玩笑：「為乜將個人私隱四圍唱？」

　

　　係，我係刻意「四圍唱」的。原因簡單，小弟算是少少知名度，也有傳播力量。就此，覺得凡上天「安排」我病，總有一個任務指派。

 

人生恍似早有劇本，上天不時有指示及任務。

 

　　事實，我由90年代開始患驚恐症，八年後轉為抑鬱症，再到幾年前眼中風。

　

　　每一次，我都將病發原因及治療過程詳細透過傳媒發放。結果，單單驚恐症（當年冇人知係乜！）及抑鬱症，已影響到不少人（部分乃知名人士）立即求醫，救回生命（因個別已到自殺邊緣！）。另外，眼中風也如是。

　

　　我將整個病徴及醫治歷程公開，有助大量同一病患者及早尋求治療而得到康復。

 

我患上驚恐症、抑鬱症及眼中風後，皆將詳細發病及治療歷程在傳媒公開，結果令更多人能及早尋求適當診治。

 

　　這個上天「使命」，我欣然接受，繼續執行。

　

　　好了，回說十日前頸部鎖骨對上突然出現無名腫瘤，半隻雞蛋般大。於是，火速找家庭醫生「小明」李家仁。大家見佢唱歌時好搞笑，但變回醫生時，則專業嚴肅：「阿碌，呢個腫瘤可大可小。先用排除法，你立即先驗血看癌症指數！」

　

　　李醫生診所位於嘉賓大廈，恍似「醫生大樓」，甚麼科的專家及化驗所有齊，非常方便。

　

　　揸住驗血表一出A室，行過對面B室已是抽血中心。過癮，櫃位登記完，入房抽血，咦…，乜係接待位小姐做埋，果然是multitask！

　

　　現今科技，即抽即驗即知。半小時報告已到李醫生手。瞄一眼：「血就正常。第二步，睇睇耳鼻喉是否有任何變異情況。呢張醫生紙，你去搵袁興耀醫生驗驗啦！」

　

　　一睇地址，也是搞笑，原來在隔離！推門出，轉過身入到袁醫生診所。

　

　　李家仁70年代香港大學畢業，同期的全部專科人馬，個個極資深，袁醫生當然如是。

　

　　手法純熟，用不同儀器及用手替我耳鼻喉逐一檢查，很快已落判斷：「唔關耳鼻喉事，你應該去睇甲狀腺專家。我稍後比報告李家仁醫生！」

 

出現任何體內病徵，抽血及超聲波，可以初步發現或排除不少可疑問題。

 

　　轉身又回到李醫生診所。

　

　　「嗱，第三步，要去搵何旭熙醫生，佢主治甲狀腺問題，可以立即做超聲波檢查！睇睇你個腫瘤裏面有乜。」

 

今次我出現甲狀腺腫瘤，也決定及早公開，看看能否幫到更多同病者。

 

　　今次，又揸醫生紙去排期，需要等三日，因何醫生非常「好生意」。（待續）

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情