上星期教授大家一些簡單應節菜式，今期教授另一款可以預早準備好的冷盆。

 

　　材料一樣非常之簡單，可以作餐前小吃或當主菜都可以，菜式就係「涼拌手撕雞」，若然唔想做冷盆，浸熟的雞都可以做美味的白切雞。或一次過浸兩隻雞，一隻拆絲做涼拌，另一隻雞做白切雞，一舉兩得。浸完雞的雞湯加埋拆出來的雞骨及雞殼可以放回入雞湯內煲，留作用來烚菜或煮餸用的上湯。

 

烹煮時間: 1小時

 

份量 : 3-4人

 

 

材料:

 

　　光雞1隻 700克、即食海蜇 1包、甘筍 100克、青瓜 1條、已炒白芝麻 1湯匙

 

醃雞料:

 

　　幼鹽 2茶匙、紹酒 2茶匙

 

調味料:  (預先拌勻)

 

　　鮮露 3湯匙、雞粉 1/2茶匙、砂糖 1/2茶匙、麻油 2湯匙、白醋 1湯匙

 

做法:

 

 

　　1. 光雞去除內臟，沖洗乾淨抹乾，將醃雞料的紹酒及鹽搽勻在雞皮及雞腔內，放入雪櫃醃3-4小時或醃1晚。

 

　　2.  燒熱一鍋熱水，水滾將雞放入，改用細火將雞慢火浸煮25-30分鐘至熟，用刀插入雞脾位置，若無血水流出，即代表雞已熟透。然後將雞放入冰水內浸涼，盛起瀝乾。

 

　　3.  青瓜及甘筍去皮沖洗，切幼絲放入大碗中，加入調味料拌勻，放入雪櫃醃15分鐘。

 

　　4.  將雞肉用手撕出雞絲，加入青瓜甘筍絲內拌勻。

 

　　5.  將即食海蜇排在碟上，然後將雞絲排放在海蜇上，最後撤上白芝麻即成。

 

韋太小貼士:

 

　　浸雞的熱水不能太滾，否則雞肉會粗嚡（音：鞋）而不好吃，浸熟的雞要立即改浸冰水，雞皮及肉才會爽口滑溜。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇