工聯會領導層啱啱改選完，之前嘅理事長吳秋北就「升Level」做咗會長，原本嘅會長林淑儀（淑儀姐）就加多兩隻字、同陳婉嫻一樣做「榮譽會長」，不過之前都係榮譽會長嘅鄭耀棠（棠哥）就冇咗個名，Down Grade變返做普通會員咋噃！

 

工聯會領導層啱啱改選完，大家認得幾多個?

 

棠哥唔做何解呢？

 

　　棠哥聲望咁高，連淑儀姐都話佢係一個Icon：「一講鄭耀棠三個字就知係工聯會」！咁點解而家退出領導層呢？淑儀姐就話係棠哥嘅個人意願，所以佢都冇點樣追問落去。連淑儀姐都冇再問落去，唔通棠哥此「退」另有原因？計Jenny話，無所謂啦！棠哥已經係港區人大，Level仲高啦！

 

黃國、黃國健傻傻分不清

 

　　秋北「升呢」做會長，咁佢本身理事長個位邊個做？原來就係副會長兼秘書長黃國喇！唔好以為Jenny打少咗隻字，事關真係「黃國」做理事長，唔係立法會嗰個「黃國健」（KK）！雖然兩個名好似，不過大家就成日可以喺立法會見到KK，而黃國就多數做後勤嘅，所以大家對佢唔多熟悉一啲都唔出奇！

 

　　呢位新任理事長都同Jenny講，之前有行家報道佢哋新一屆領導層嘅新聞，就真係將佢同KK撈亂咗！佢仲同Jenny講，其實喺佢家族排字輩嚟講，佢嗰代係叫「黃景Ｘ」，不過唔知老竇有啲新思維定點，覺得起一個字嘅名型啲，所以就改咗「黃國」呢個名啦！

 

 

認住喇!拎咪呢個就係「黃國」喇，唔係立法會嗰個「黃國健」呀!

 

老人先用Facebook 搞埋網台得唔得？

 

　　黃國嘅爸爸有「新思維」，佢本人都一樣有噃！黃生同Jenny透露，而家工聯會好著重傳訊方面，亦都招攬緊唔少人才幫手，希望可以吸引多啲會員同加強溝通喎！佢仲話，而家宣傳攻勢分咗3條路嚟行，分別係整月刊、整網頁同埋搞Facebook，諗住可以老中青三代人都涉獵到，仲話見到泛民嗰搞網台咁成功，都有計劃搞埋一份！不過Jenny仲記得今年年頭先聽到一句震驚20億Facebook用戶嘅說話：「Facebook係老嘢先用！」黃生想用Facebook打動年輕人的心，可能都係捉錯用神……

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

全新節目《說說心理話》青少年不可以戀愛！？真實個案講述驚心動魄經歷► 即睇