中學文憑試今日放榜喇！今年一共6位狀元誕生，比上年多咗2位！就算唔係狀元，拎到五科5**嘅同學都有84位。成績好固然係半隻腳踏入「人生勝利組」，但即使天子門生，都一樣有一個卑微願望－－上公屋！

 

愈租愈貴 愈搬愈細

 

　　以往有唔少狀元都係出身名校，同埋有返咁上下家底，所以基層狀元一直係焦點話題。梗係啦！咁先夠「貼地」呀嘛，在有限的資源下發揮天賦，即使唔係贏在起跑線，亦可在終點線領前！

 

　　所以Jenny非常欣賞今年考獲6科5**再加1科5*成績、讀皇仁書院嘅朱尚哲同學。家住300呎唐樓嘅佢，由出世到而家已經搬過8次屋，並非因為「孟母三遷」，而係業主逼遷！佢仲話細細個月租5000蚊嘅單位，而家已經叫租16000蚊！你話邊有可能唔搬！

 

　　眼看屋企愈搬愈細，佢榮登天子門生嘅一刻，心願只係想上到公屋，家人嘅生活環境可以得到改善，同埋攞獎學金出國讀書學醫。佢明言相信「知識改變命運」呢句說話，所以今日就拎到張靚靚成績表報答爸爸媽媽。之不過，樓價日日升，朱同學日後如果真係成功實現志願做咗醫生，好可能佢份人工都唔夠買層納米樓！

 

 

未來有冇得上樓 還看林鄭如何出手

 

　　當連天子門生都要為上樓頭痕，如此卑微嘅願望，亦折射出其實香港嘅土地問題有幾嚴重。睇返資料，政府就曾經話過目標係3年上樓，之但係Jenny翻查數據之下發現，截至今年3月底，公屋輪候冊申請已有近28萬宗，平均要4.6年先至可以「上樓」，加埋今期居屋超額認購50倍呢個數，可想而知市民對公營房屋需求幾咁龐大。

 

　　事實上Jenny認識嘅一啲基層家庭，佢哋都話申請公屋等咗成7、8年先上到樓！未上到樓就要一直住劏房，仲要租金幾個月幾個月咁加，所以佢哋只能夠成日搬屋度日。難怪運房局局長陳帆去探劏房戶嗰陣都忍唔住喊出嚟！唉！比著以前古代，狀元有得住狀元府，做榜眼探花都有個一官半識，唔行差踏錯的話，都可以安居樂業吖！睇返而家香港？Jenny唔係話要政府送層樓畀班狀元學生，而係當本來應該專心求學問嘅學生哥，都要為頂上片瓦憂心，咪話唔心酸！

 

　　所以林鄭新政府為教育投入新資源之後，下一個要處理嘅就係土地住屋問題。根據《長遠房屋策略》2016年周年進度報告，喺確保每年1.8萬伙私樓單位土地供應嘅同時，仲爭可建4.4萬個公營房屋嘅土地，先可以Fulfill個10年建屋計劃。

 

　　林鄭競選時，多次強調佢嘅房屋政策係以置業為主導，亦預告會有「首置上車盤」。Jenny在此希望，第時朱同學學有所成之後，擔心嘅唔再係上唔上到樓，而係新買嘅樓點樣裝修，佢同父母亦不用再為住屋而愁。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

etnet榮獲HKEX Awards 2023 「最佳表現證券數據供應商」大獎► 了解詳情