加入最愛專欄  收藏文章 

2024-02-28Text: 娛樂組

盧宛茵、吳浣儀嘆電視業每況愈下!後輩教返自己做戲?盧宛茵見新演員多人服侍:見啲人出外景都作嘔!

  盧宛茵(Madam Lo)和吳浣儀近日接受楊紹鴻的YouTube Channel《小鴻吹水站》訪問,大談由昔日《朱門怨》起開啟兩人的演戲之路。兩人分別都有離開過TVB,不過Madam Lo就成功回巢,但吳浣儀就沒有,楊紹鴻指有傳當年亞視開拍《十六不搭喜趣來》,傳影射「翡翠台」,劇中吳浣儀正是飾演影射方逸華的角色,因而得罪高層最終被TVB封殺。

 


(電視截圖)

 

  Madam笑稱自己苦情戲、喜劇、喊戲、正派反派都可以,「我鍾意樣樣都試下玩下,我唔係話認叻,但要樣樣嘢都咁樣做到,唔好局限演一款。」提到Madam演而優則唱,她表示最難忘是《流行經典50年》的演出,「有次黎小田見到我,佢話記得我唱得兩嘴,仲話第日搵我上《流行經典50年》唱,後尾隔好耐打電話嚟,話有晚英文歌之夜啱我就搵我去,好感激,原來當時黎小田已經病緊,我唱嗰首仲要係老餅歌冇乜人識,但黎小田識,佢負責重新編曲同彈琴,之後冇耐佢就走咗,好深印象,對大家都係個好好嘅回憶。」

 

(資料圖片)

 

  提到Madam和浣儀在電視圈度過50年的光景,對於電視圈的蛻變,兩位都不禁搖頭嘆息,Madam說:「係每況愈下,無論劇本、導演、演員……不過係我覺得啫!」吳浣儀同意並形容是「夕陽工業」,楊紹鴻說:「我只能講不進則退,大家都搖頭嘆息,見到而家成四、五十歲做小生真係搲晒頭。」他認為近來不少劇集角色都只會交代父母已歿,事關實力甘草演員都紛紛離巢。Madam大方談青黃不接的原因,她說:「我哋以前有戲劇大師阿King(鍾景輝)教我哋出黎,真係獲益良多,而家《好聲音》(《中年好聲音》)唱下歌又出嚟拍(劇),拍下廣告又出嚟拍(劇),我哋真係搲晒頭!仲要好多人樣樣唔識好似一嚿雲咁,仲要走去教人喎,(唔敢教你呀?)唔係呀,有人叫我呢句對白應該咁樣講,我望下佢,唔答佢,之後照我自己做,我使乜理佢!」

 

 

  吳浣儀坦言近年接拍電影都見過不少新演員有貴賓式的待遇,「我出面見好多啦,拍電影一大班人跟住,成房都擠滿晒,一人帶一堆!」Madam不解:「我哋拍《季節》嗰,大碧姐(鄧碧雲)咪又係一個人返嚟,帶咩呀帶?而家睇見啲人出外景都作嘔,一個擔遮,一個拎杯茶,一個撥扇……嘩,大佬而家咩事呀?此風不可長,以前做戲邊度會咁?我都唔知點解搞到咁,以前碧姐從來唔係咁!」Madam認為各大電視台都有一定的責任,老闆往往眼中只有錢,她曾經在一個活動上,打算向高層反映某劇集問題,「佢係完全唔明我講乜,同佢講個劇集,佢唔知我講乜,永遠只係睇賺唔賺錢,唔明拍劇係乜嘢,我哋咪嘥氣囉!」

 

(《愛回家之開心速遞》電視截圖)

 

轉載自: 晴報

全新etnet健康網購,送你【健骨維他命D3(1000IU)】乙樽(價值$108)► 立即行動!

更多娛樂情報文章
你可能感興趣
#小鴻吹水站 #Madam Lo #演戲 #Youtube #楊紹鴻 #訪問 #TVB #吳浣儀 #盧宛茵 #影視娛樂
編輯推介
即時報價
全文搜索
Search
最近搜看
大國博弈
貨幣攻略
More
Share