【晴報專訊】張敬軒和師妹曾樂彤將在本周日舉行的《星光熠熠耀保良》首度拍檔演出，二人昨日一齊跳舞綵排，曾樂彤笑言因見到軒仔太緊張，要頻頻去廁所「定驚」，抵死的軒仔聞言，即形容自己是「通便丸」，相當幽默。

師妹曾樂彤年僅24歲，軒仔笑言可做對方爸爸。

　　張敬軒與曾樂彤昨日率先在傳媒面前表演，只見曾樂彤明顯相當緊張，不時以笑遮掩尷尬，她說：「我同軒仔載歌載舞，但係我好驚踩到佢，因為我好想留個好印象畀佢，所以緊張到流晒汗，仲係咁去廁所。」身旁的軒仔聞言，即發揮搞笑本色說：「呢個即係讚美？我係通便丸，或者係龍蝨，因為有利尿作用！」

　　軒仔大爆二人早前錄歌時，曾樂彤在半小時內去足兩、三次廁所，軒仔說：「我問佢係咪腎虧，擔心佢到正式表演又要去廁所唔知點算。」曾樂彤即十分尷尬，但仍講笑說：「我緊張所以係咁飲水，到時我會著尿片頂住！」

網紅出身適應力強

二人將在《星光熠熠耀保良》表演大型歌舞。

　　軒仔大讚曾樂彤乖巧，適應能力強︰「佢有種70、80年代嘅追求同熱情。近年較少參與無綫大騷，少咗機會去排舞，但佢好努力去練習，有時間就練。」軒仔又說：「樂彤網紅出身，有方法應付網民批評，EQ比其他新人高，我反而要向佢學習。」