【晴報專訊】去年缺席四個樂壇頒獎禮的容祖兒，元旦日憑《心之科學》，首奪叱咤頒獎禮「至尊歌曲」大獎，完成「大滿貫」集齊叱咤各大獎項，祖兒下個目標是向唱作人進發，期待將來橫掃幕後大獎。

祖兒首奪至尊歌曲大獎，相當感動。

　　對於完成「叱咤大滿貫」，她興奮表示︰「由第一首同舒文合作嘅《不容錯失》開始，上到榜嘅歌都係第七、第八，無上到三甲，但舒文同安仔（許志安）又得，唔知我剋佢，定佢剋我。等咗20年終於等到，我今年想朝創作路進發，要曲詞編監，呢個係我2019年目標。」

古天樂得獎後隨即離開，未有現身慶功宴。

　　講到古天樂現身及親手接過「我最喜愛的男歌手」獎，祖兒認真恭喜對方︰「我哋有私訊，我叫佢梗係要嚟，佢係演藝人協會會長，我哋食咗幾餐飯，佢唔係講電影，係講點樣可以推動樂壇，既然佢咁有心又有咁嘅機會，我覺得呢個timing係最好，畀佢喺度同大家分享下，再加兩句金句，係咪圓滿先？」

　　古天樂得獎後清唱《男朋友》，祖兒在台上有份幫口唱，但就忘了歌詞，她笑指古仔個key好難搵。祖兒又爆古仔知道樂壇好歡迎他，亦蠢蠢欲動，加上當晚唱的開心，睇的又興奮，倒不如大家推一推他重返樂壇吧！那祖兒寫歌給他？她認真表示︰「我嗰發子彈一定射畀佢嘅，瞄住佢咁射。（寫首快歌畀佢？）快歌係咪容易食糊啲？」

軒仔9獎暫牽頭

軒仔透露三月份將舉行一場籌款晚會，希望令演藝人協會的資金運作更好。

　　張敬軒當晚連奪三大獎項包括「男歌手金獎」、憑《百年樹木》獲「我最喜愛的歌曲大獎」及以《天才兒童1985》獲叱咤第五位，暫時在不同頒獎禮中共得九個獎成為男歌手大贏家。於慶功宴受訪時，軒仔笑言「9」字好意頭，有長長久久、長攞長有意思。

　　軒仔是香港演藝人協會副會長，對於會長古仔得獎亦替他高興︰「佢用自己嘅資源、資金為呢個行業做咗好多嘢，所以佢拎到呢個獎特別有意義。古仔雖然沒有再出唱片，但仍很關心樂壇。」軒仔透露古仔有意舉行一個類似台灣金曲獎的可持續發展、有獨立性兼認受性的頒獎禮，並將注意力放於幕後音樂人身上，例如錄音師、混音師等。