25/02/2019
袁偉豪張寶兒澄清不急於結婚 粉絲繼續撥行大葵扇
【晴報專訊】37歲的袁偉豪(Ben)與27歲的港姐女友張寶兒(Bowie)日前驚爆喜訊,有雜誌封面指男方已求婚成功,惟二人其後都否認其事,Bowie更在IG反問男友「你同邊個求咗婚」,公然耍花槍。很多網友催促Ben盡快完成人生大事;有粉絲指空穴來風未必無因,猜測二人好事近!
去年憑劇集《棟仁的時光》成為馬來西亞及新加坡雙料視帝,入行逾20年的袁偉豪,事業終於得到肯定,他與拍拖兩年多的張寶兒亦愛得如膠似漆。去年尾,Bowie與Ben、Ben母到日本外遊睇紅葉;今年農曆新年,二人又互相到訪對方家中拜年,令人覺得這對圈中情侶打風都打唔甩。
Ben在農曆新年前於珠海參加小型賽車比賽,女友Bowie亦有隨行支持他。
前日,有雜誌封面大字標題「Ben試探式求婚,張寶兒:『我跟你』」消息震驚香港娛樂圈。
Bowie被問造裙褂
袁偉豪(右一)日前與汪明荃等參與東華的慈善音樂會。
然而,Ben對傳聞卻堅決否認已婚,他在IG幽自己一默︰「就嚟做咗人老竇都唔知,多謝各位關心!我還未結婚,仲未求婚,有消息再話畀大家知。」Ben身邊不少圈中好友包括黃翠如、周柏豪、林盛斌等也懶理婚訊真與假,先後留言送上祝福,Ben女友Bowie更忍不住在男友發帖下留言抽水︰「你究竟同邊個求咗婚,點解我唔知?」同時她亦於IG出Po,自言被人問及婚訊,更透露有人問她可有需要造裙褂,令她大感無奈。
Ben緬甸拍戲搵真銀
Ben前晚現身機場前往緬甸拍戲,明顯心情大好。
事實上,Ben在雜誌的訪問中,透露曾與女友談及婚事,Bowie回應︰「我跟,我跟你!」似有所暗示。Ben並坦言日後結婚有意在海外註冊,亦不排除突然閃婚,回港才作正式公布。他並指好友黃翠如已介紹很多海外註冊的地方,因此不少人估計很快聽到這對情侶的好消息。
單文柔(中)去年與陳展鵬結婚,身為好姊妹的張寶兒亦有到賀。
很多網民睇好兩人有望開花結果;有人亦讚Ben與Bowie超登對,期待他們快快製造愛情結晶品。
另一方面,現時Ben已身在緬甸仰光拍攝電影《使徒行者︰諜影行動》,他昨晚特別於IG發布限時動態,分享在當地名勝的拍攝花絮,看來Ben已放鬆心情,重投工作懷抱搵老婆本。
轉載自: 晴報
全新節目《說說心理話》青少年不可以戀愛!?真實個案講述驚心動魄經歷► 即睇