【晴報專訊】盛傳將於今年底舉行跨年演唱會的陳奕迅（Eason），昨日到油塘出席《第二期賽馬會樂動網球計劃》記者會。他從小學習打網球，笑言覺得打網球十分有型，更即場與小朋友切磋球技。

Eason即場示範球技，絲毫沒有生疏。

　　陳奕迅昨日以香港網球總會推廣大使身份出席活動，一身運動裝的他即場在烈日下示範球技，雖然全身爆汗依然心情大靚。

視費達拿為偶像

　　Eason自言打網球得到啟發︰「我七歲開始打網球，可以改善我嘅壞脾氣，我自細脾氣好差，可能因為喺屋企排最細，畀人縱壞，但係打網球脾氣差係發揮唔到嘅，所以要沉住氣。每個人都有脾氣，有人會嗌出嚟，有人會掟球拍，有時都會傷害到自己，我覺得打網球對自己嘅情緒係一個好好嘅訓練。」

　　Eason表示，有時打波時遇着天氣熱，更要集中精神︰「要去到好專業，就要對自己有要求，好似我偶像費達拿咁，佢以前脾氣都好差，但依家變成一個好瀟灑嘅人，網球真係可以鍛練到涵養。」Eason又搞笑說︰「我鍾意打網球，因為我覺得打網球嘅朋友係好有型嘅，有型就得！媽咪教我做多啲運動，咁就無力去發脾氣，我都覺得做運動之後咩脾氣都無，係可以抒發情緒同能量。」