• |
  • 極速報價
  • |
  • 會員
  • 產品服務 / 串流版
  • 設定

28/11/2017

邊個會做港區人大?齊睇「祝福名單」懶人包

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  噚日Jenny同大家講到公民黨郭家麒成為第一個宣布參選人大嘅民主派人士,亦都口快快應承大家八下人大嘅「祝福名單」,相信大家都好想知有邊個榜上有名呀呢!Jenny今日就整理吓近排各路流傳出嚟嘅消息,整咗個「祝福名單」懶人包!先旨聲明以下皆為小妹四處八卦得來嘅消息,信不信由你!

 

 

棠哥同吳秋北今日交表參選,話唔知「祝福名單」,你估Jenny信唔信?

 

10個舊人退下來 新人群起「爭櫈仔」

 

  其實今屆有10個代表一早放風將會退落嚟,包括常委范徐麗泰、代表團團長譚惠珠、梁劉柔芬、劉健儀、學者劉佩瓊、前保安局局長李少光、楊耀忠、張鐵夫、行會成員查史美倫同埋羅范椒芬。36個位,有10個唔做,即係至少有差唔多三分之一嘅空位,唔怪之得今次選舉吸引咗咁多新人前來「爭櫈仔」啦!

 

棠哥秋北未聽過「祝福名單」?

 

  不過除咗退落嚟嘅10人,即係仲有26人打算留低「競逐連任」喇! Jenny就估,既然上屆做得,今屆只要唔行差踏錯嘅話,「祝福」斷估應該會自動降臨。Jenny一於趁今日鄭耀棠(棠哥)同埋吳秋北呢兩現屆人大「師兄」交表參選嘅機會,旁敲側擊一下份「祝福名單」!點知兩位好似夾晒口供咁,齊齊答「唔知!」仲話冇聽過份名單咁話!棠哥!你無「聽」過唔緊要,「見」過咪得囉!Right?

 

新人入面有譚Sir又有美雲

 

  講講新人嗰邊先啦!Jenny綜合各路消息,見到而家最多人談論嘅就有盛傳會接替范太做全國人大常委嘅譚耀宗(譚sir)、前政制及內地事務局局長譚志源、律師會前會長林新強、因「反佔中」上位嘅陳曼琪呢幾位。仲有其他新人包括陳曉峰、洪為民、陳守仁之子陳亨利、李君豪,教聯會會長黃均瑜、江西省政協兼前港姐鄺美雲、張俊勇、林龍安、「80後」金融界女強人詹美清。仲有啲「新人」據聞受「鼓勵」參選,例如教育評議會主席何漢權,同埋公開大學科技學院院長何建宗等等。Jenny數過,淨係「新人」都有15個!

 

「祝福」難測「二代」無影

  

  計計埋埋,新仔加「老鬼」Total 41個,位就得36個,咁咪有啲人會名落孫山?據Jenny手上資料,曾經高呼「我覺得共產黨好偉大」嘅前香港律師會會長林新強,同埋「80後」金融界女強人詹美清就唔係張張「名單」都榜上有名。而一班「人大二代」,好似范太乖仔范駿華、梁劉柔芬囡囡梁穎宇,仲有「富二代」霍啟剛,暫時未見影。之不過,「祝福」呢家嘢,猶如女人心一樣咁難測,一日未公布,一日都仲有變數!

 

坊間流傳之「祝福名單」一覽:(溫馨提示,僅供參考)

 

競逐連任:

王庭聰、王敏剛、田北辰、李引泉、吳秋北、吳亮星、林順潮、胡曉明、馬逢國、馬豪輝、姚祖輝、陳勇、陳振彬、陳智思、張明敏、黃友嘉、黃玉山、葉國謙、雷添良、廖長江、鄭耀棠、蔡素玉、蔡毅、霍震寰、盧瑞安、顏寶鈴

 

新面孔:

譚耀宗、譚志源、林新強、陳曼琪、陳曉峰、洪為民、陳亨利、李君豪,黃均瑜、鄺美雲、張俊勇、林龍安、詹美清、何漢權、何建宗

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生