• |
  • 極速報價
  • |
  • 會員
  • 產品服務 / 串流版
  • 設定

20/06/2018

港大校長張翔下月17號履新 內地出身難獲信任?

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  今年三大(港大、中大、科大)齊齊換校長!先係中大新校長段崇智喺今年元旦上任,科大新校長史維亦都會喺下個學期開始上任,係得港大新校長張翔一直未知幾時上任,所以首席副校長譚廣亨都已經署任咗校長差唔多半年咁耐喇!

 

 

 

暑假中期上任 免開學踢晒腳

 

  Jenny就打聽到,署理校長譚廣亨噚晚8點就出咗個Email通知港大師生,新校長張翔會喺下個月17號履新,任期係5年。喺暑假中期嚟上任,唔通張校長想熟悉吓校園先?咁都啱嘅,大家都知一開學就實會踢晒腳,到時先上任就麻煩啲喇!

 

  其實張翔喺上年12月就已經獲任命做港大第16任校長,而佢個來頭都幾唔嘢小!等Jenny同大家溫下書啦!張校長係美籍華裔科學家,專研納米科學及工程,係美國加州大學柏克萊分校葛守仁基金講座教授,由2003年起一直喺嗰度做納米科學及工程中心主任,又喺2014至2016年間做勞倫斯柏克萊國家實驗室材料科學部主任。而佢發明嘅「納米隱形衣」,仲曾經拎過《時代》雜誌嘅十大發明添!

 

上任第一課 宜博取學生信任

 

  張翔份CV睇落就幾省鏡,不過唔少人都質疑佢對香港大學校園內嘅爭議都唔太了解,而且上任港大校長馬斐森雖然做過院長,但都被人質疑佢揹唔揹得起成間大學做校長;而今次張翔之前就更加係只係做過系主任,欠缺大學行政經驗,今次仲要係出任香港一流校府嘅校長,自然就受到同馬斐森一樣嘅質疑喇!

 

  另外,佢亦都係係港大歷來第一個喺內地出世、亦都係喺內地完成高等教育嘅校長,再加上佢又講過,大學應該要探索所有資源,包括內地嘅官方資源。所以喺佢啱啱獲委任嗰時,唔少港大人都擔心張翔做唔到捍衞學術同院校自主,對佢唔太信任。咁佢上年同港大師生會面嗰陣,就強調會捍衞學術自由,又話校園內可以學術討論港獨,不過就要受法例規管!

 

  其實,大學每次換校長都會惹起爭議,不過學生多數喺呢啲位都係無辦法影響到啲乜,而喺公布咗張翔嘅上任日期之後,港大學生會會長黃程鋒就話,希望新校長履新後可以加強學生會同校方溝通,同埋希望會喺下學年開學後舉辦活動,等新校長同同學進一步交流喎!計Jenny話,張校長如果想改善大家嘅印象,睇嚟就要把握好呢啲機會喇!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生