【晴報專訊】蕭正楠（阿蕭）和曹永廉（阿廉）主持的飲食節目《兄弟大茶飯》播出近一周，兩位好兄弟煮定美食走訪各地，餵飽正在開工的一班TVB同事。二人在節目中大騷廚藝兼口衰衰互窒，成功擦出火花。不少視迷指二人講有味笑話超過癮；有人更讚《兄》比《美女廚房》更吸引！

　　去年尾的旅遊節目《公公出埠》有黎耀祥、黃浩然、蕭正楠及曹永廉四位劇集《大太監》男星，今次則由阿蕭及阿廉雙劍合璧，主持一連十集《兄弟大茶飯》，節目於本周一晚上10時30分首播。兩兄弟今次化身型男廚神炮製佳餚，兼四出探班，第二集到訪《多功能老婆》的劇組，以溫泉蛋海膽飯及鱈魚膠糖水慰勞同事們。二人與劇中演員包括楊千嬅、朱晨麗、陳煒及洪永城等擦出火花，雙方言論踩界，對白抵死，成功爆出不少笑料。

千嬅坦言未聽過鱈魚膠，更懷疑糖水並非由阿廉及阿蕭親手製作。

　　至於前晚播出第三集，阿蕭遠赴浙江橫店影視城，為《包青天再起風雲》演員包括胡定欣、姚子羚等人炮製美食及湯水。

定欣子羚玩謝阿廉

阿蕭在橫店影視城的簡陋地方洗米，但也成功煮出意大利磨菇飯。

　　阿廉有份參演《包》劇，但他亦在百忙中抽空動手煮齋；至於阿蕭就特製「橫店版意大利磨菇飯」，當子羚望實圓形的黑松露時，亦乘機講有味笑話搞氣氛︰「我諗起第二啲嘢，呢個器官會唔會細少少！」其後胡定欣更幫口︰「係咪跟住阿廉嚟做㗎？」兩位花旦言語間明寸阿廉，非常搞笑。不過，當身在當地拍攝超過一個月的定欣，難得有機會品嘗最愛的花膠雞湯及梅菜扣肉時，她表現得異常感動，畫面充滿人情味。兩位「公公」今次大騷廚藝兼做外賣仔，不少粉絲指節目構思有新意，一對拍檔異常合拍攞滿分；有觀眾亦指對白低俗堅好笑。

　　此外，昨晚第四集中，阿廉和阿蕭重提12年在橫店拍攝《大太監》的回憶，阿廉更讚對方拍戲認真，盡見兄弟情。