【晴報專訊】張學友前晚於紅館舉行尾場《學友．經典-香港站．再見篇》演唱會，亦是他巡唱兩年多以來，第233場兼最後一場該巡迴演出。學友前晚忍不住哽咽，更笑言完成巡唱後，有種失業的空虛感。

　　前晚張學友在台上賣力演出，台下除了有劉嘉玲、舒淇、梁家輝、杜德偉等星級嘉賓外，學友大女張瑤華更坐第一行支持，瑤華全晚跟住爸爸唱歌，又與爸爸握手及做心形手勢，令學友當眾感謝家人兩年多的包容和支持。

張瑤華向爸爸學友做心形手勢，相當窩心。

　　學友在台上坦言不捨得個唱完結，更輕抹眼淚哽咽說︰「雖然我唔捨得，但都係自己叫停，唱歌係我呢生人最鍾意，叫停係因為想進步，唔想停喺呢個階段，其實我好想同團隊一直表演落去，但我已57歲，過幾年60歲，唔知仲可以有幾多進步，我答應大家喺不久將來，帶嚟更好嘅演出，希望過十年再開個唱都見到你哋。」到最後encore環節，學友獻唱《Amour》、《你的名字我的姓氏》、《只想一生跟你走》等多首經典金曲，演唱會在11時半落幕。

囡囡變粉絲

雖然帶病上台，但學友演出未受影響。

　　完騷後，學友在後台開香檳慶祝，問他完成巡迴後最想做甚麼，他笑說︰「有種失業的感覺，我講真嘅，我依家諗聽日點呢，下個禮拜又點呢，無嘢做，咪準備過年囉！」他笑言要先將自己交給家人，他表示前晚太太羅美薇也有在場睇騷︰「大女睇咗十幾場，細女要返學，睇咗五、六場。」提到大女睇騷時十分投入，變成爸爸的歌迷，學友甜笑說︰「係呀，佢以前唔係咁㗎，呢個算係收穫，囡囡都有畀意見，但佢唔係專業，所以無乜參考價值。」

　　學友表示下一個目標是籌備音樂劇︰「做音樂劇同演唱會好唔同，做演唱會我可以自己搵人，但做音樂劇有好多嘢處理，劇本稍為唔滿意，即使搞咗半年都係白做，自己度蹺又渣，諗完再睇番其實好屎，所以急唔嚟，盡力啦！」問到巡唱兩年，是否有過億元歌酬落袋？他笑說︰「講錢失感情！（係血汗錢喎！）你哋都睇得出呢。」