《愛‧回家》老友記Rap爆舞台 網民激讚 劉丹︰愷威睇到好開心

　　【晴報專訊】無綫處境劇《愛‧回家之開心速遞》前晚帶來驚喜，劉丹率領羅樂林、陳榮峻及黎彼得化身Hip Hop組合「大四喜」Rap出Freestyle，成功在網絡洗版，丹爺受訪時自爆昨日落街時，有街坊Yo住向他打招呼。不少視迷Like爆《愛》玩得盡，有人更熱捧「大四喜」闖樂壇！

　　前晚《愛》劇播出第542集，四位老友記加埋近280歲，卻以Hip Hop裝扮和戴住金鏈組成隊伍「大四喜」，出戰電視台選秀節目《香港齊Hip Hop》。丹爺打頭陣，Rap出「Hey，乜嘢叫做IG我哋唔知，我哋淨係知，企喺台上我哋可以。」之後，三位拍檔輪住Rap，表現驚為天人。

「大四喜」一夜間爆紅，未知無綫可會考慮為他們灌錄唱片。

　　其實劇中的比賽抄足內地真人騷《中國新說唱》，除了有感動得掩面痛哭的現場觀眾，更有A貨G.E.M.及吳亦凡擔任星級評審，將該場戲拍得抵死又過癮。很多劇迷大讚該集笑中有淚；喜見四位老友記Rap得勁過MC Jin。

網友狂推台慶再Rap過

75歲的劉丹擺出型爆甫士無難度，絕對是寶刀未老。

　　昨午本報聯絡到丹爺，他回應︰「我哋之前夾咗兩次，之後各自錄音，Rap對我來講有少少難，今次畀自己80分，估唔到咁短時間有咁好成績！」丹爺又稱︰「今朝（昨日）落停車場都有人同我Yo……Yo……Yo……，當時我都醒唔起！」他更透露太太與囝囝劉愷威也有捧場，並稱︰「愷威睇到笑得好開心，仲讚我唱得好！不過孫女（小糯米）好早瞓覺就無睇！」

難得丹爺在劇集中化身Rapper，囝囝劉愷威當然捧場。

　　對於網友大讚四人活力十足，劉丹戲言若多些時間練習會更好，至於服裝則由公司幫他們安排，再交由他們自己配搭。提到網友狂推四人殺入年尾台慶，丹爺笑言︰「睇公司點安排啦！」

　　此外，《愛》劇的收視繼續高踞首位，本月11至17日的七天跨平台總收視達27.8點，完勝劇集《皓鑭傳》（24.8點）及《福爾摩師奶》（23點）。