12/04/2019
張衞健想搞棟篤笑挑戰自我
【晴報專訊】「第28屆香港舞台劇獎頒獎禮」前晚於香港大會堂舉行,袁富華憑《攬炒愛情狂》從頒獎嘉賓張衞健(Dicky)手上接過最佳男主角(喜劇/鬧劇),而入行多年的關寶慧亦憑《她媽的葬禮》首奪最佳女主角(喜劇/鬧劇)。
早前有傳Dicky想搞棟篤笑或開個人演唱會,他不諱言有人斟他,但他還未諗掂,原因兩樣都未做過,他笑謂︰「都唔知自己係咪可以應付,不過一定唔會二合一,但係弊在我有呢個才華,可以分開做,只怕紅館無咁多期畀我,12個月畀晒我都唔夠。」
記者笑問他字典裏有否「唔掂」兩個字?Dicky笑言︰「好大隻添呀!而且好大壓力。」他指壓力來自質量及票房︰「我都幾擔心無人嚟睇,我都想好似Sammi開騷咁,希望自己有呢個勇氣去挑戰!」
他又稱舞台劇是他第三樣想挑戰的,自言演戲多年,又是唱歌出身,早已有舞台經驗,兩者夾埋正是「舞台劇」,或者搞音樂劇又得。當中哪一瓣最有信心?Dicky表示樣樣都有,但問題是觀眾覺得好不好看︰「當中應該棟篤笑最難,演唱會、舞台劇或音樂劇,都有導演、劇本、對手幫助,講求團隊精神,棟篤笑有90%來自演講者。」
得獎靠風水屋
袁富華不忘舞台劇,希望有時間再做。
袁富華在老本行奪獎,高興之同時亦見證有新人接棒,他希望舞台劇界能培養更多接班人。對於最近頻頻攞獎,他笑言可能搬入風水屋有關,事緣去年超強颱風「山竹」吹襲,多家住戶都受破壞,惟他的住所卻安然無恙。憑《翠絲》提名金像獎最佳男配角,可有增加信心?他謙稱︰「好難講,個個對手都好強,會以平常心看待。」
轉載自: 晴報
etnet榮獲HKEX Awards 2023 「最佳表現證券數據供應商」大獎► 了解詳情