【晴報專訊】無綫熱播劇《殺手》前晚掀起高潮，Zero（陳豪飾）發現雯雯（江嘉敏飾）被殺，最終佛爺（李成昌飾）及紅姐（樊亦敏飾）命喪Zero槍下。陳豪對於亡友女兒雯雯之死悲從中來一幕，盡見視帝級演技。昨日他回覆《晴報》時稱︰「好感恩畀到我一個咁好嘅角色。我嘅一貫宗旨係：一路嘗試、失敗、再改進。」

　　陳豪在前晚第22集中可謂演技大爆發，他打算到廢屋拯救雯雯時，赫然發現她早已喪命，陳豪面對其屍首表現得欲哭無淚，盡見悲痛之情。其後他一槍了結兩大奸人佛爺及紅姐，令觀眾大快人心，亦充分演繹出殺手之王的霸氣。

Zero發現雯雯被殺後，激動得額頭現青筋，絕對交足戲。(網上截圖)

　　對於今次的演出，陳豪說：「好榮幸有機會拍到呢套題材咁新鮮嘅劇。」而監製陳維冠則表示︰「阿Mo（陳豪）表現水準之上，有101分！該幕內心戲（告別雯雯）好震撼，充分演繹到佢嘅憤怒！」他指阿Mo頭十幾集角色性格常是嘻皮笑臉，之後甘願為兄弟的女兒犧牲愛情（與李佳芯分手），演繹得夠入血，陳維冠直言︰「之前無見過阿Mo有咁嘅演出，贏過視帝嘅佢都畀到驚喜我，可以話融入咗Zero呢個角色！」至於網友就睇好陳豪在年尾爭視帝；更指其內心戲令人拍爛手掌。

連環殺手搞風搞雨

Zero一心要為雯雯復仇，誓要置佛爺於死地。(網上截圖)

　　問到兩大奸角佛爺與紅姐忽然被殺，陳維冠坦言冀望劇情推進更明快︰「佛爺係一個好有氣場、令劇中其他人感受壓力嘅大人物，希望觀眾估唔到佢咁快死！雯雯咁快死亦一樣，希望對觀眾產生意想不到嘅效果！」

佛爺和紅姐在劇中甚為搶鏡。(網上截圖)

　　至於下星期結局周劇情，他說︰「無話集中邊一個人，角色環環緊扣會有追看性。（會出現殺手獵人？）其實我哋無呢個稱呼，可能殺手會遇到一個連環殺手！有個Zero Killer。（Parker（謝東閔飾）係連環殺手？）咁要觀眾睇落去，可能佢未出現過，亦可能已曝光好耐！」雖然他大賣關子，但不少網民紛紛循着各種蛛絲馬迹，尋找誰是連環殺手。