• |
  • 極速報價
  • |
  • 會員
  • 產品服務 / 串流版
  • 設定

18/09/2020

難忘的颱風襲港一役 馮盈盈︰「山竹」下開工似拍災難片

  • 加入最愛專欄
  • 收藏文章

  【晴報專訊】熱帶氣旋「紅霞」若進一步接近香港,天文台或有機會發出一號戒備信號。其實,近年本港遇上颱風甚至超強颱風的次數增加,不少打工仔都期待「風假」,但藝人卻未必享有這種假期,只要是開工的日子,無論外面橫風橫雨,沿路樹木倒塌,都要設法回到工作崗位。兩年前超強颱風「山竹」襲港,造成史無前例的破壞,馮盈盈更形容猶如災難片般!

 

馮盈盈每次遇到颱風下要開工,就感到十分頭痛。

 

  要數近年最猛烈的颱風,大家一定想起超強颱風「山竹」,而馮盈盈回憶當年在「山竹」吹襲下開工,印象難忘。她說︰「好記得嗰日係『山竹』吹襲最大風嘅一日,街外好似拍緊荷里活科幻片咁,雖然我係打風後先開工,但見到街上好多樹都塌晒,嗰一刻,仲以為自己拍緊災難片,因為我要繞過或跨過倒塌嘅樹先可以行到。」

 

  好多人都趁颱風吹襲前儲糧,但馮盈盈笑言屋企長期有足夠儲備,媽媽經常買備很多食物放在家中,她笑說︰「反而防風措施就真係要學,之前拍《學是學非》學過點樣用膠紙黐玻璃才可以防止爆破,不過我好快就唔記得,但我知道用『米』字唔係最好嘅方法。」她又表示,每次打風,家中愛犬都有好強的反應,「佢會吠得好犀利,又流晒口水,要我抱佢同氹佢,好似照顧BB仔咁樣。」

 

湯怡︰吹到成幢樓搖晃感覺無助

 

湯怡重提兩年前超強颱風襲港,仍感到怕怕。

 

  跟馮盈盈一樣,湯怡對「山竹」的風力強勁亦記憶猶新,因為當年湯怡首次搬出來獨居,卻撞正這個超強颱風來襲,嚇得她感覺似是世界末日。她說︰「好記得係前年七月,嗰時我第一次搬出嚟住喺將軍澳,『山竹』吹襲,附近好多地區都吹爛咗啲玻璃,加上自己住近海邊,感覺風力更加驚人,而且我啱啱搬入去新居,但又唔識做防風措施,屋企連一卷牛皮膠紙都無,卒之要問鄰居借保鮮紙封住啲窗。」

 

  湯怡又表示那次的風力相當強勁,最恐怖是坐在家中亦感受到整幢樓在搖晃,她說︰「其實幢樓搖晃相信係卸力,我知道應該係好安全,但嗰一刻只得自己一個,就覺得好無助。」

 

張振朗︰中學時貪玩落街感受風力

 

張振朗自認好曳,但不希望自己成為壞榜樣。

 

  張振朗細細個已經好百厭,就算打風都唔願意乖乖地留在家中。他表示︰「嗰時仲讀緊中學,住喺屯門,有一次打風,我同兩個同學一齊落街感受風力。嗰時真係貪玩,完全無諗過危險,不過我哋無去沙灘嘅,但其實我哋落街吹咗一陣,完全唔覺得個風真係好勁。(打風落街有冇畀人鬧?)呢件事真係無人知㗎,我依家先第一次講,嗰時又真係唔識驚囉,只係覺得個風吹埋嚟無想像中咁勁。」不過,振朗表示,其實打風外出真的好危險,也會連累他人,因此他寄語大家千萬不要學他做曳事!

 

許家傑︰冒風雨返公司做世界盃直播

 

許家傑直指颱風過後的善後工作,才最令他痛腦筋。

 

  許家傑最難忘的打風經歷,是多年前世界盃期間,他被安排返公司做直播,「記得嗰晚係八號風球,初時我仲以為唔使返公司,不過監製話係直播節目,所以一定要返。嗰日真係好慘,一出門口已經橫風橫雨,我無揸車,要喺街上乞求的士司機載我由粉嶺去將軍澳,好彩最後都有的士司機肯載我,不過車費都要$500,其實截到車已經好好彩,到收工時我就『黐』同事車走。」

 

  此外,每次打風許家傑都會擔心水浸問題,「我住村屋地下,打風時經常會水浸,好彩嗰次只係廚房水浸,但水位都浸到遮晒小腿咁高,當時我即刻帶幾隻狗仔到安全嘅地方暫避。但其實颱風過後,要清理現場先最慘,啲泥沙全部沖晒入屋,要搞好耐才可以清理得乾乾淨淨。」他又記得小時候打風,很多店舖都會關門,所以打風前夕都要盡量儲糧,不過現在很多店舖會照常營業,打風也不太擔心沒有食物充饑。

 

轉載自: 晴報

全新etnet健康網購,送你【健骨維他命D3(1000IU)】乙樽(價值$108)► 立即行動!

我要回應

放大顯示
師傅靈靈法

職場新常態

精選文章

  • 生活
  • DIVA
  • 健康好人生
專業版
HV2
精裝版
SV2
串流版
IQ 登入
強化版
TQ
強化版
MQ