【晴報專訊】鄭中基（Ronald）將於本月23至25日假中環海濱活動空間舉行《Drive In Ultra-WEE are Ronald Cheng》演唱會，連日來積極綵排。Ronald透露私下曾邀請九歲女兒鄭梓喬（Emma）及六歲兒子鄭梓仁（Evan）擔任個唱嘉賓，最後卻慘食檸檬，令他相當無癮。

鄭中基強調雖然戶外騷的車輛套票已售罄，但仍有座位門票以供選購。

　　鄭中基昨日在葵涌與演唱會製作單位開會，由於今次是戶外汽車騷，所以在舞台設計方面花盡心思，除了有巨型LED熒幕，更有兩個T字型舞台伸延至中間大舞台，與觀眾作近距離接觸，Ronald興奮表示︰「條T字舞台好長，我啲歌又慢，又要同觀眾握手，可能要唱三首歌先至行得完，所以我要求導演安排一架車畀我。台下啲車會『品』字形咁排，後面就係觀眾座位，加上1.5米距離，一定唔會睇唔到個台。」他又憶述自己初出道時曾於台灣舉行戶外騷，感覺跟室內騷大不同，他說︰「戶外同室內騷最大分別喺視覺上，例如紅館有個頂，放煙花唔可以太勁，今次就安排咗啲大型煙花，又有吊臂同航拍機拍低成個演唱會。」

預留門票做善事

鄭中基的一對子女今次選擇坐定定睇騷支持爸爸。

　　Ronald亦表示曾詢問過一對仔女有否興趣做表演嘉賓，他稱︰「佢哋話今次唔喇！因為有車坐梗係坐喺下面睇，醒呀佢哋！同埋我個仔好娿哿（音︰啊個），佢問有無蚊㗎，屙尿咁點算，我話你用尿片啦，咁多嘢問！」不過廿四孝的Ronald已為囝囝準備了戶外小便器，方便他看騷期間人有三急要搵廁所。另外，今次Ronald除了為演唱會準備主題曲《玩咗先至瞓》，亦預留了部分門票給幾間慈善機構，免費邀請一班低收入家庭的小朋友及年輕人睇騷，認真有心。