• |
  • 極速報價
  • |
  • 會員
  • 產品服務 / 串流版
  • 設定

05/07/2017

企位變一變人就變和善?林鄭誓要搣甩「CY」味

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  林鄭月娥對立法會答問大會一定唔陌生,但以特首身份出席,今日就第一次。新官上任明顯睇到佢好想擺脫「CY 2.0」的稱號,實現佢所謂嘅「管治新風」。第一件事,我哋從佢今日個企位就可以睇到!不過,係咪真係有「新風」同係唔係「CY 2.0」,點可能一日就落判斷?不過,泛民議員同Jenny講,覺得佢冇CY咁「撩交打」。就咁聽,未來大和解就冇可能㗎喇,但唔似CY時代咁日日「開片」似乎都有啲機嘅!

 

 

林鄭心情靚 企歪有因由

  林太今日去完答問大會,似乎心情好好,仲喺Facebook出Post話:「好耐無試過咁平靜!」除咗睇聽佢今朝講咗咩(Jenny就覺得冇咩大驚喜),我哋仲可以留意吓佢企咗喺邊。嗱!林太雖然坐咗CY個位,但去立會就決定唔企佢個位,選擇「靠邊站」,企喺主席右邊答議員問題。


  為防大家唔記得,容Jenny講少少歷史。CY之前嘅曾蔭權同埋董伯伯年代,佢哋去立法會答問會或者發表施政報告,都係企立法會主席旁邊,係得CY企喺主席前面發言。


  一向「唔輸得」嘅林太竟然揀返「靠邊站」?行會成員湯家驊(Ronny)就同Jenny解畫,佢話林太專登揀「企歪啲」,係想顯示自己嚟到立法會都只係客人,以示尊重立法會的地位。

誓要搣甩「CY 2.0」

  Jenny覺得,林太係想以行動話畀大家知,佢同CY唔係同一類人。回想當日選特首時,林太已經講咗好多次自己同CY一啲都唔似,Jenny仲聽聞佢其實好介意人哋叫佢「CY 2.0」。可惜,新班子同新行會成員太多前朝舊人,結果都係被人叫「CY 2.0」,要呢個花名離佢而去,單係改個企位同《施政報告》發表日期係唔夠㗎,未來點執政「新風」實質係點,先係重點,你真係唔係「CY 2.0」的話,大家係會睇到嘅。


  咁點解企右邊唔企左邊呢?其實係有原因㗎!據Jenny所學過嘅國際禮儀,慣例上通常會「以右為尊」,所以好多機構或者官式場合,身份尊貴嘅嘉賓都會被安排企右邊嘅。

 

  Jenny另一個諗法就係,如果企左邊,難保有人會諗多咗,話佢「親左」,與其係咁,多一事不如少一事啦!

企位變一變 人就變和善?

  完左答問大會之後,田北辰就同Jenny講,覺得林鄭係有心要搣甩「CY 2.0」呢個標籤。連李慧琼都覺得,刻意咁企係重視行政、立法關係嘅表現。琼子你咁講,即係話以前CY唔重視行政立法關係啦?


  至於泛民嗰邊,似乎都畀林鄭呢個改「企位」嘅行動打動咗?公民黨黨魁楊岳橋(AY)難得「讚」林鄭,話佢咁做令議會冇上屆咁重戾氣,「唔係嚟撩交打」。民主黨涂謹申就覺得,林鄭表現「好忍得、EQ高咗」。唔通企位變一變,人就變和善?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生