• |
  • 極速報價
  • |
  • 會員
  • 產品服務 / 串流版
  • 設定

08/08/2017

一地兩檢支持定反對多? 入嚟睇一睇咪知囉!

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

   「一地兩檢」呢個議題繼續發酵,今日又多一個「關注XX」出現喇,仲係由一班建制法律界人士組成,有法律背景嘅立法會議員梁美芬、何君堯、吳永嘉,加埋張國鈞同周浩鼎一齊整咗個「法律界關注一地兩檢聯席」。而家日日兩邊嗌交,嗌到火紅火綠,都係自說自話,究竟一般普羅大眾又點睇呢?政府唔做公眾諮詢,坊間都有各種民調,畀我哋一窺民意嘅!

 

自由黨都唔執輸,剛剛都做咗同一地兩檢有關嘅調查。

 


民調窺民意


  繼有傳媒委託港大民意研究計劃喺8月初訪問517名市民得出嘅調查顯示,過半市民支持政府提出的一地兩檢方案,而後生仔學歷愈高就多數傾向反對一地兩檢方案;而教育程度愈低、年紀愈大嘅受訪者傾向支持方案。

 

  自由黨都唔執輸,剛剛都做咗個調查,結果發現逾六成受訪者支持「一地兩檢」方案,主要認為可以體驗高鐵的效率。反對者則認為會影響一國兩制,呢個調查人數就多啲,分別成功收集1071個及1262個受訪者嘅意見。

 

  立法會航運交通界議員易志明同Jenny講,佢相信市民識權衡利弊,所以會認為「一地兩檢」值得採納。飲食界嘅張宇人就話,而家反對嗰啲人係「自己嚇自己」,佢仲話日後會再進行多一次跟進調查,觀察結果會唔會有唔同。

 

支持率持續上升

 

  《經濟通》及《晴報》兩個星期前開始,亦都發起嘅網上投票,而家已經有超過32萬人表達立場,當中支持「一地兩檢」有9成咁多㗎!勁呀呢!大家睇吓就知啦!http://lifestyle.etnet.com.hk/column/voting.php?id=861

 

 

  另一邊廂,「一地兩檢關注組」臨時聯絡人陳淑莊,就對自由黨呢個民意調查就唔多like,認為調查設計入面強調西九「一地兩檢」係深圳灣模式「唔公道」,因為兩者唔可以就咁類比。

 

  佢同Jenny解釋,當年深圳灣模式係中央政府賦予更多權力畀香港,而今次就係相反。但係,而家個個民調都話支持多反對少噃?佢就話,唔擔心民意難以逆轉噃,仲話當初「23條」咪一樣冇人關注。佢仲同Jenny強調咗好多次,話任何民調都唔可以代替公眾諮詢,批評政府推說時間唔夠只係藉口。Jenny都知公眾諮詢同民調嘅做有好大分別,但政府唔肯做,大家都冇辦法啊!

 

病假完要派餅,係咩玩法?

 

  另一個熱話就一定係「屯門興德學校風波」,事關呢間學校個File極厚,除咗令人O咀嘅請完病假要派餅卡咁離奇嘅「傳統」外,最大問題係竟然用29個「影子學生」想呃政府開班津貼!件事咁離譜,教育局局長楊潤雄都要親自出面講兩句,話「調查升級」,由警告及「嚴重勸喻」至委任校董加入興德學校校董會作了解同協助。

 

  今次興德學校嗰位校長陳章萍下晝開咗個記者會,但係畀記者們問到口啞啞,點拆都拆唔掂!佢強調從來對得起學生、老師和校董會,話自己無做、亦唔會做犯法嘅事。點知轉頭就有消息話,警方已接獲教育局轉介,懷疑有人偽造教師聘用文件,案件已經交由重案組第一隊接手調查,暫時無人被捕。世事嘅嘢,往往就係咁戲劇性。

 

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生