• |
  • 極速報價
  • |
  • 會員
  • 產品服務 / 串流版
  • 設定

28/08/2017

施政報告準備如火如荼 郭家麒計數險老貓燒鬚

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  新政府上場兩個月,特首林鄭月娥為咗佢首份《施政報告》不斷周圍見人、見政黨等等拎意見,又要不斷飛來飛去訪問唔同地方,同各方領導「打招呼」可謂未停過,Jenny聽負責跟林鄭出入的IO(新聞主任)們講,呢位CE真係十個勤力,所以佢地都唔敢鬆懈。今日,公民黨就公布咗個民調,結果發現整體來講,都有近五成人有信心林鄭份《施政報告》可以回應市民訴求,比冇信心嘅人多少少咁啦!如果你話林鄭只係「做門面功夫」,Jenny會覺得結果係市民又Buy喎!

 

 

公民黨會按民調結果向林鄭提意見。

 

47%人有信心  44%冇信心

 

  聽日公民黨就同林鄭傾《施政報告》,當然會畀啲意見佢啦。所以公民黨由6月底去到8月中旬,就做咗個民調去收集下民意先。睇返民調,都訪問咗2116人㗎!連公民黨立法會議員郭家麒醫生都話冇試過做民調可以成功訪問到咁多人,睇嚟呢個民調都夠晒代表性啦卦?

 

  份問卷分咗三部分嘅,第一部分問有關政制與管治方面,第二部分就係問民生議題方面,最後就係有關對新政府嘅信任同選舉嘅問題。郭醫生話,雖然林鄭一上場就話到明,今屆政府唔搞政改,只著眼民生議題,所以一嚟就整個36億撥款畀教育界,但係睇返個民調入面,有差唔多六成人都想重啟政改,亦都有超過一半人話選委會選嘅特首唔代表到自己。所以郭醫生就叫林鄭唔好諗住用錢掩住市民把口,要著手解決深層次矛盾先得!

 

  大家以為泛民政黨民調一定唱衰政府?有時數字係唔呃人嘅!喺民調入面,有條問題就問到市民,對新一任政府回應市民期望嘅信心有幾大,當中有47%人話有信心,44%人就冇信心,因為仲有個選項叫「沒有意見」,而且有信心嘅市民仲比冇信心嘅市民多咗少少嘅……3個百分點。

 

上車難過登天 牙痛慘過大病

 

  但係郭醫生今次可能計錯數,留意唔到嗰3個百分點差距,佢見結果得47%人話有信心,話覺得林鄭「唔合格」。郭醫生畀行家一問「但有信心多過冇信心喎?」就好似Feel到「瀨嘢」,即刻改口同Jenny解釋話林鄭喺政府做咗咁多年,差唔多個個部門都做過晒咁滯,但最後都係「唔夠一半人」對佢有信心,「呢個並唔可以稱得上係合格嘅分數」。郭醫生仲話,佢本來估以林鄭嘅經驗會高分啲,點知有信心淨係多冇信心3百分點,所以佢先覺得真係好低分。哎吔!又畀你兜到喎!

 

  不過,Jenny都好關心市民點睇民生方面嘅問題,其實個調查仲問埋住屋,全民退保及醫療與教育方面。調查發現,最多人認為,需要做好醫療同教育工作,認為要「遏抑樓價,重建置業階梯」都唔少人。唉,望住樓價日日升Jenny對「上車」早已不存希望(除非中六合彩!)。

 

  郭醫生作為醫者,對政府投放於醫療服務資源一直不足都忍唔住講多幾句。佢話之前流感高峰期公立醫院逼爆,病人受苦,正正就揭示咗公營醫療服務不足,而藥物名冊又令唔少長期病病患者、罕有病病人面對沉重醫療開支同埋「有病無錢醫」嘅苦況。

 

  郭醫生仲同Jenny講,香港欠缺咗牙科政策,令無法負擔私人牙科醫療費用嘅市民飽受牙疾之苦。明呀!Jenny真係明!牙痛真心慘過大病呀!

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生