• |
  • 極速報價
  • |
  • 會員
  • 產品服務 / 串流版
  • 設定

03/01/2019

言論屢惹爭議 天主教港區主教楊鳴章逝世 

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  上年2018年有唔少名人都離我們而去,2019年啱啱開始冇幾耐,又傳來一單名人離世嘅新聞,就係天主教香港教區主教楊鳴章今日下午因肝衰竭病逝,終年73歲。

 

 

常呻言論被誤會

 

  其實由噚晚(2日)深夜開始,Jenny都聽講唔少教區高層都有去探楊主教,仲一度傳出佢彌留嘅消息。去到今日上午,本來有消息話佢情況穩定,點知下午就離開咗。Jenny都覺得非常突然。

 

  雖然Jenny就冇信教,但係對呢位楊主教印象都幾深,事關經常都會因為言論而「出事」,又被標籤為「親中」,佢自己亦都經常大呻被人誤會。就好似曾經將同性戀類比成吸毒,被外界質疑將同性戀同犯法嘅吸毒行為拉埋一齊,話佢係歧視他人嘅性取向。楊主教當時就澄清,話自己唔係咁嘅意思,只係想講即使唔認同佢哋嘅行為,但都會包容、接納同埋關愛佢哋。

 

  除咗言論惹來歧視疑雲,楊主教關於政治嘅言論一樣好具爭議。例如講到六四事件,雖說佢就話冇理由唔支持當年嘅學生,但係自己就唔會「撼頭落去」幅牆到;而大陸近年亦都大力強拆天主教及基督教堂嘅十字架,楊主教就只係估可能嗰啲建築物可能涉及安全問題!

 

主懷安息 下周四守靈彌撒周五出殯

 

「事事有時節,天下任何事皆有定時: 

生有時,死有時,栽種有時,拔除栽種的亦有時; 

殺戮有時,治療有時,拆毀有時,建築有時; 

哭有時,笑有時,哀悼有時,舞蹈有時; 

拋石有時,堆石有時;擁抱有時,戒避擁抱亦有時; 

尋找有時,遺失有時;保存有時,捨棄有時; 

撕裂有時,縫綴有時;緘默有時,言談有時, 

愛慕有時,憎恨有時;作戰有時,和睦有時。」

—訓道篇 第三章1-8節

 

  一個人嘅言論冇可能討好所有人,點都好,楊主教就已經去咗天父嘅懷抱喇,塵世間嘅紛擾就留返畀世人煩惱啦。願楊主教主懷安息。

 

  下星期一至三(7至9日)會喺堅道明愛禮堂為楊主教設吊唁冊,下星期四(10日)晚上8點會喺主教座堂舉行守靈彌撒,下星期五(11日)早上10點就會舉行出殯彌撒,之後就會將楊主教嘅靈柩安葬喺跑馬地天主教墳場。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

沒有相關資料。

  • 生活副刊
  • DIVA
  • 健康好人生