• |
  • 極速報價
  • |
  • 會員
  • 產品服務 / 串流版
  • 設定

09/01/2019

泛民又甩轆 AY開會失蹤變「民主派發叔」

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  今日政治新聞重點除咗國歌法,就係楊岳橋(AY)原定今日提出嘅檢討單程證政策議員議案,兩單都咁重要,行家們當然都如臨大敵啦!點知……輪到佢提議案嘅時候,佢竟然唔喺位!結果成個議案不獲處理,就咁被Kill咗喇!姍姍來遲嘅AY今次自製政治炸彈畀自己,咁「甩轆」法真係冇眼睇呀!

 

 

 

AY「關鍵缺席」議案被Kill

 

  話說AY提佢個檢討單程證政策議案之前,係討論勞工界議員潘兆平嘅檢討假期政策議案,大家講完一輪就極速不記名表決,行家們即刻打醒十二分精神。點知,大主席梁君彥開口,話提出動議嘅AY不在席,唔處理佢嘅動議,直接宣布休會。

 

  原本仲笑笑口行出電梯嘅AY,即刻樣都變埋,急急腳衝去會議廳,但可惜為時已晚!大主席已經宣布咗休會喇,AY個表情灰到呢……仲流露住一啲唔知點算嘅徬徨!梗係啦!「關鍵一席」變「關鍵缺席」,成為「民主派發叔」,今次仲唔畀對家笑到面黃?

 

建制乘機「潤」 葉劉:你撻Q喎!

 

  果不期然,建制派議員當然乘機「潤」吓AY,喺走廊見到AY嗰時,話「我等緊你個議案喎!」新民黨葉劉淑儀仲問:「去咗邊呀你?」、「你撻Q喎!」。蔣麗芸(Ann姐)仲fb出Post話佢「自編自導自演自失蹤」、「每位議員在每屆立法會只有一次動議機會,楊議員居然自殘動議,費解!」

 

  當時喺會議廳入面嘅區諾軒話試過起身叫點人數,但大主席開聲先過佢,佢覺得今次係大家全體責任,唔可以怪任何人。不過,AY就一於攬晒上身,連鞠兩次躬致歉話「今次唔能夠提動議唯一責任係我楊岳橋」。咁點解你唔準時返嚟開會先?佢話,睇緊《國歌法》記者會直播,用六粒字總結:「一心不能二用」!仲同Jenny講衰咗就衰咗,預咗成為攻擊對象。

 

  Jenny就覺得睇直播呢回事,助理都可以幫手啦!議員們,唔好成日口口聲聲「以為」、「以為」,就真以為一切如你哋所想至得!今次泛民又甩轆,仲要甩大轆,Jenny真係鬧得多都嫌口臭呀!

 

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生