• |
  • 極速報價
  • |
  • 會員
  • 產品服務 / 串流版
  • 設定

29/05/2019

香港世界競爭力畀新加坡「扒頭」 派4千一鑊泡「政府效率」都奪冠?

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  瑞士洛桑國際管理學院(IMD)今日(29日)發表咗《2019年世界競爭力年報》(下稱《年報》),香港嘅全球競爭力排名今年畀新加坡「扒頭」、屈居第二!呢個報告係統計全球63個經濟體,用「經濟表現」、「政府效能」、「企業效能」同埋「基礎建設」四個項目去評分。不過最令Jenny疑惑嘅唔係香港被「扒頭」,而係派4000蚊都要等足一年嘅地方,「政府效率」評分竟然可以位列全球第一!

 

 

香港變「阿二」

 

  睇返報告嘅四項排名,新加坡全部都排十名之內︰「經濟表現」第五、「政府效率」第三、「營商效率」第五、「基礎建設」第六,當然可以攞第一啦!反觀綜合排第二嘅香港,「營商效率」排第二、「政府效率」排第一、「經濟表現」排第十,但「基礎建設」嘅排名即使輕微上升,都只係排二十二名咋!至於由去年榜首連跌兩級嘅美國,「經濟表現」同「基礎建設」都位列世界第一,不過「營商效率」就入唔到十大(剛剛排第十一),「政府效率」更排到第二十三名呀!

 

  對於呢次《年報》嘅結果,香港政府發言人就話,政府一直致力提升香港經濟嘅競爭力同活力,認為《年報》再一次肯定香港係全球最具競爭力嘅經濟體之一。發言人又話,面對環球經濟體激烈競爭,政府必須繼續鞏固香港嘅競爭優勢,包括︰自由開放嘅市場、高效嘅公營部門、公平同方便嘅營商環境。發言人仲話,香港政府會積極加強基礎建設、創新科技、培育人才同增加土地供應等方面嘅投資,為香港經濟長遠發展提供有利環境。

 

職津處咪累全家

 

  講到要鞏固「高效嘅公營部門」呢個競爭優勢,Jenny最希望就係負責執行「派4000」嘅在職家庭津貼辦事處(職津處)可以成為一個高效部門,快啲處理晒所有申請,快啲派錢畀申請者就好喇!事關Jenny嘅母親大人原本諗住有多$4000可以去個短Trip,點知等到暑假旺季都嚟緊,都只係收到個確認通知咋!希望職津處加強一吓個效率啦,唔係拖低埋成個政府效率,下年連呢個項目都畀其他地方「扒頭」就So Sad啦!

 

「港元定存息率」大比拼 食息都要食得醒 https://goo.gl/i9KA4Y
我要回應

  • 生活副刊
  • DIVA
  • 健康好人生