• |
  • 極速報價
  • |
  • 會員
  • 產品服務 / 串流版
  • 設定

11/08/2016

【西遊後傳】偶遇。笑篇

  • 加入最愛專欄
  • 收藏文章
  • 黃美雲

    黃美雲

    黃美雲小姐(Ms. Amy Wong)有豐富公關廣告經驗,現為廣告公司合夥人,亦是Media Training及溝通技巧的培訓專才。

    黃小姐研究玄學多年,並根據其豐富的商場經驗,融會形象包裝、掌相學、望診學、身體語言、溝通技巧、談判策略、危機管理等學問,編創了「極速性格解碼學」課程,為行政人員提供另類管理智慧。她先後為渣打銀行、香港中華煤氣有限公司、賽馬會等主持培訓課程。

    曾以黃愛媚的筆名,在報章雜誌撰寫專欄,出版的書包括《公關十八般武藝》。

    本欄逢周四更新

    玄來更精彩

  還是猴年,講講孫悟空啲兄弟。

 

  話說沙僧完成了取經這mega project之後,在天上一直投閒置散,悶到暈,弄到情緒低落,便去見天上的心理治療師。

 

  「唔!你嘅問題,源於一直自我形象低落。你大師兄好勝,二師兄好色,都得到廣泛嘅注意,唯獨你定位模糊,成日做亞四。咁啦!我現在俾個assignment你,你落去人間做個實驗,要做啲形象鮮明嘅事,重塑自我。」

 

 

  沙僧碌咗落地球之後,首先去整容,跟住去創業。因為從前擔得行李多,於是去咗做物流,又利用電子商貿、雲端科技、機械人等,竟然開展了一個物流王國,仲上埋市,叫「密密流」集團。

 

  由於他現在已成了帥氣企業家,獲頒「香港十大講金講心創者」大獎,在頒獎晚宴上,他恰巧坐在一位美麗得獎者身旁。

 

  沙僧這幾年努力拓展事業,無暇拍拖,在此喜見一位有才有貌的熟女。據了解,她專門攪關懷弱勢社羣女性的NGO,攪得有聲有色,因而獲獎。沙僧見她身材豐滿、樣子標青,而且愛心爆棚,晚宴後即自動請纓送她回家。

 

  臨別時,沙僧大膽地問:

 

  「朱小姐,請問你現在有冇男朋友?」

 

  「冇。」

 

  他心中大喜。

 

  「不過,有女朋友。」

 

  他登時失望之極,她看了心中不忍,便安慰他說:

 

  「你唔好失望,我話個天大嘅秘密俾你聽,我其實係豬八戒,整咗容先至咁靚咋!」

 

  「吓!二師兄!我係沙僧呀!」

 

  「哎喲!唔怪得黑黑實實啦!你又整咗容咪?」

 

  「係呀!點解你變埋性呀?」

 

  「你有所不知,我喺天上,因為口多多、手多多,俾啲仙女投訴,申訴公署判咗我人間社會服務令,佢地話為咗要我尊重女人,就將我掟咗落去泰國,變咗性,本來我係豬扒一件,不過好在我帶咗啲私己錢,私人醒個醫生,整番靚。你知啦!我始終都係鐘意女人,所以現在已經有親密女友。」

 

  「我地真係有緣。係呢,唔知大師兄點呢?」

 

  「佢以前成日喺廟度,聽啲人稟來稟去,煩到死,自覺可能經歷緊中年危機,於是就轉咗行囉。」

 

  「咁佢而家做乜呀!」

 

  「嘩!而家風光囉。因為整咗容,甩哂啲馬騮毛,滑滑,做咗明星,都唔知幾enjoy。仲有,佢話現在換咗個大老闆,唔駛俾觀音點咧。」

 

  「都要俾導演點㗎?」

 

  「唓,佢而家咁紅,掉番轉頭點導演就真。你知嘛,佢而家拍片,帶埋編劇去,隨時改對白、換場景、加戲份、添笑位。唔駛好似嗰陣時咁,俾師傅箍住,叫佢去東就去東、去西就去西!」

 

  「好似只係去西咋噃。是但啦,咁佢做D乜角色咁巴閉呀?」

 

  「吓!真係好笑,有時做番自己——老孫,套片仲收咗十億人仔添,唔係少嘢!」

 

  貪靚呢家嘢,真係人間整容忙,神仙也瘋狂!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

  • 生活副刊
  • DIVA
  • 健康好人生