• |
  • 極速報價
  • |
  • 會員
  • 產品服務 / 串流版
  • 設定

29/03/2018

【洩密風波】個人私隱危危乎,Facebook就此玩完嗎?

  • 加入最愛專欄
  • 收藏文章
  • Michael & Derek

    Michael & Derek

    著有《我做媽劇停》一書,撰寫「市場」及「職場」兩大類文章。經常與不同機構及院校合作舉辦Marketing及職場座談會。

    本欄每周四更新

    我做Marketing

  早前Facebook洩密風波,除咗引發用戶發起刪除帳號活動之外,亦令股價大跌,好多人覺得Facebook王國會自此沒落。其實一直以來,成日會有人講「Facebook玩完」、「冇人再會玩」,更有中小企老細覺得直頭唔應該投資金錢喺Facebook做生意,認為Facebook marketing只係「霧水情緣」,害怕投資太多最終只會「傷感情」。但其實一間市值幾千億美金、連繋全世界用戶嘅國際企業,係咪話咁易就玩完?感覺就好似以前金融風暴期間,有啲金融機構係「Too big to fail」一般。咁講可能誇張咗,但其實又真係少少類似,一來因為佢哋擁有太多有用嘅資料,二來佢哋喺廣告/marketing中亦佔一重要席位。

 

 

全面嘅資料庫

 

  好多人都知道,Facebook擁有好多個人資料如email、電話、密碼、個人背景等,但呢啲只係佢哋資料庫嘅其中一部分,另外佢哋仲有好多商業/企業資料。一般而言,好多較大嘅商業/公司用戶都會將自己客戶嘅電話、email等資料,先以消費能力、年齡層、習慣等等分門別類,經加密後上載到Facebook用作「Remarketing」。亦有公司用戶或個人用戶,會將公司架構同自己嘅職位上載到Facebook,以便公司管理及招聘人才。除此之外,我哋喺messenger/WhatsApp嘅對話記錄亦係資料嘅一種。久而久之,Facebook除咗擁有各行各業、不同公司嘅商業情況,亦擁有個人用戶不同類型嘅資料,對社會、政治、商業等各方面都有重要影響,只要加以分析,資料嘅用途可以好廣泛,左右總統選舉已經係好好嘅例子。試問一間咁有影響力嘅公司,要玩完並唔容易。

 

對廣告界嘅重要性

 

  隨著Facebook嘅興起,佢喺廣告行頭上亦影響深遠,某程度上可以話改變咗行業嘅發展。第一件事係,Facebook養住好多小編、KOL同廣告商,其次Facebook亦為中小企帶來好多商機。以前做生意,如果你係初創公司或者小型公司,要落廣告做宣傳其實好難。多數嘅細公司成本有限,但廣告公司嘅收費已經佔廣告成本一大截,仲要未知成效好壞,感覺就好似未見官先打八十一樣,加上以前嘅宣傳渠道亦唔多,宣傳有局限。但Facebook廣告就打破咗呢個局面,將門檻大大減低,細公司可以「自己廣告自己落」,當然成績一定不及廣告公司,但起碼「落廣告」變得並非遙不可及之事,令廣告平民化。另外,廣告嘅精準度亦有所提高,廣告類型同玩法都有好大變化,間接將content marketing變成主流之一,令social media出現咗好多好似毛記呢類嘅搞笑廣告,令廣告行頭百花齊放。如果Facebook真係玩完,相信好多人都會被打爛飯碗。

 

  老土講句,呢個世界冇話冇左邊個唔得,但社會嘅定律就係一雞死一雞鳴,就算Facebook 真係難逃一劫,好有可能第二個Facebook又會出現,洩密問題亦會再次發生。

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生