眾星叫陳凱琳「大嫂」 黎耀祥唔灌醉嘉穎︰要早生貴子

　　【晴報專訊】鄭嘉穎和陳凱琳（Grace）日前在峇里完婚，婚後繼續在當地享受二人世界，Grace今天亦首次以人妻身份，為嘉穎慶祝49歲生日。有份出席婚宴的圈中好友，前晚陸續返港，而嘉穎的《鐵馬尋橋》好兄弟姊妹，笑言已乖乖改口叫Grace做「大嫂」。

（左起）黃嘉樂、馬國明、唐詩詠、曹永廉、唐文龍及黃智賢出席婚禮後，即回港開工。

　　黎耀祥夫婦、《鐵馬尋橋》馬國明、唐詩詠，以及曹永廉、黃智賢前晚返抵香港機場，祥仔大讚婚禮感動又開心：「大家都好戥新人開心，尤其等新娘子步入教堂一刻，心情真係好興奮。」有否催嘉穎努力造人？祥仔笑說：「我有叫佢努力！當日晚飯後有個after party，大家散晒就去休息，但我哋叫嘉穎唔好休息，要早生貴子！我哋好識做，無灌醉佢。」

祥仔夫婦送飾物給新人作賀禮。

　　至於馬明及詩詠則笑言一見「大哥」嘉穎在婚禮上開口講感受，已忍不住感動到喊，詩詠說：「林子善喊得最勁，我哋都改咗口叫（陳凱琳）大嫂。」另外，問曹永廉及黃智賢可有傳授夫妻相處之道？阿廉搞笑說：「我邊敢呀？雙方家長就有分享，叫佢哋要有包容，如果打就千祈唔好打面，因為要靠樣搵食。」

開始「鄭太」新生活

陳凱琳與鄭嘉穎在晚宴上情深一吻。

　　而升呢人妻的陳凱琳，昨日亦在IG Po新相，包括行禮及晚宴咀嘴合照，分享新婚喜悅：「現在鄭太身份，開始我人生的新一頁！」她又感謝籌備婚禮的團隊，及出席的親朋戚友，令她留下永世難忘的回憶。