拍完劇一身輕 馬國明賺外快儲老婆本

　　【晴報專訊】馬國明、高海寧和黎諾懿前晚夾錢請新劇《C9特工》台前幕後食煞科宴，早前因拍劇推掉不少活動的馬明，笑言煞科後可以密密接Job賺外快，努力買「磚頭」及儲老婆本。

高Ling笑言最喜歡跟馬明演對手戲，因為都是談情戲份，拍得比較舒服。

　　馬明前晚心情十分輕鬆，他笑言拍完劇終於有時間踢波及洗車，最重要可以接活動密密搵真銀。是否要儲定老婆本娶女友黃心穎？他笑說：「係媽咪話唔夠錢使，佢最近使大咗。」媽媽幫手儲老婆本？他說：「呢啲要自己儲，因為我比較蠢，唔識投資，聽講樓價跌，或者會同家姐夾錢買單位收租，當做儲錢。」

　　早前馬明到峇里出席「大哥」鄭嘉穎與陳凱琳的婚禮，會否感動到想結婚？他笑笑口說：「無呀，我無嘉穎咁有錢，要儲下錢先！」他自爆旅程中跟林子善同房，令他提不起勁游水：「我喺泳池邊睇住子善水中撥髮，我諗點解唔係女仔！」

高海寧變番「豆腐Ling」

黎諾懿自爆曾在內地飲醉酒要瞓街，幸好醒來財物沒有損失。

　　至於在劇中應付大量動作戲的高海寧（高Ling），坦言拍得辛苦，更撞傷後腦及盤骨：「我以為自己可以升呢做『油豆腐Ling』，點知啱啱拍咗個鏡頭，我成個人飛剷落地，搞到成身傷痕，又畀人叫番做『豆腐Ling』！」而黎諾懿前晚帶了四箱紅酒宴客，他笑言自從結婚後已少飲酒：「太太最憎我飲醉，因為我醉咗唔湊仔都算，佢仲要照顧埋我。」