【晴報專訊】ViuTV愛情懸疑新劇《歎息橋》將於下周一晚首播，林保怡擔正男主角，他更首次擔任劇集監製，即找來好拍檔周家怡「再續前緣」。保怡坦言為籌備新劇，已經兩年沒有接其他工作，周家怡則笑言二人合作唔夠喉，更大讚林監製會畀演員很多發揮空間。

林保怡與周家怡再次合作，兩人默契有增無減。

　　劇集《歎息橋》昨日在ViuTV舉行記者會，林保怡、周家怡、伍詠薇、衛詩雅及陸駿光等演員曬冷出席。身兼監製的林保怡形容新劇是他的第一個BB，之前兩年停下所有工作，一心一意為這個BB做好準備。保怡透露︰「我會以演員角度去同其他演員研究角色，以前自己做演員，拍完就收工走人，依家會做多啲嘢。由零開始到出街，我真係好幸運，budget都唔使自己睇。」

《歎息橋》集合多位年輕演員，（左起）黃定謙、陳健朗、楊偲泳、談善言、黃溢濠及岑珈其齊現身記招。

　　在旁的周家怡笑言很榮幸能夠做到保怡的「第一個BB」，二人相識多年，繼四年前合演《瑪嘉烈與大衞系列－綠豆》，今次飾演一對青梅竹馬、由細玩到大的好朋友。家怡直認拍得未夠喉，主動向保怡提出下次再找她演出。問她覺得這位新手監製表現如何？家怡說︰「佢會畀演員好多自由空間，令片場內氣氛和諧。」保怡補充，開拍前刻意安排一眾演員食火鍋增進了解，到埋位時就自然輕鬆得多。雖然《歎息橋》已於內地網站上架，但林保怡並不擔心影響收視，有信心該劇有追看性，還笑指觀眾可能要睇兩次才明白當中意境。

伍姑娘險患情緒病

伍姑娘（左）對衛詩雅的演技給予高度評價。

　　由於劇情橫跨各人廿多年的感情轇轕，大多演員二人分飾一角。伍詠薇（伍姑娘）和衛詩雅在劇中的對手戲不多，伍姑娘大讚詩雅乖女又演技好，「佢好Sweet，佢做戲真係做得好，所以我先抄佢牌同畀佢抄牌，否則我唔理佢。」伍姑娘指她的角色患有情緒病，演出難度甚高，「我初時以為係監製搵我，原來唔係，係導演想我放低以前畀人嘅印象，好開心佢哋當我新人咁畀機會我，今次拍得好爽。（會否拍到有情緒病？）本身都有少少，但唔會抽離唔到，我做咗『90幾年』演員，無試過抽離唔到，因為我個人超級樂觀。正常人都有壓力，呢啲唔係病態，但要識調節處理，今次係我數一數二最鍾意嘅角色。」

　　此外，衛詩雅去年底在北海道滑雪整傷左腳，她表示至今仍未痊癒，整條腿痛到瞓唔到。「之前醫生話條骨裂咗，原來係成條骨斷咗，依家終於知道要點樣醫，我唔可以着高跟鞋。公司都好擔心，我有套戲可能七月開拍，戲中我要跳鋼管舞，導演都問我對腳傷勢點樣，最壞打算係用替身跳，但我好想自己跳。」

久違了的老戲骨劉兆銘（右二）在劇中飾演林保怡的父親。