素顏王菀之床上陪直播談心 張敬軒取笑︰變咗恐怖片

　　【晴報專訊】張敬軒（軒仔）昨日凌晨開IG live與粉絲傾偈，期間邀請老友王菀之（Ivana）和許廷鏗一齊直播大放笑彈。人妻Ivana不但素顏亮相，由於她在床上玩直播，令老公蘇卓航（Eric）遲遲不肯入房，軒仔不禁笑爆嘴。

直播期間，張敬軒見到王菀之無化妝，即取笑對方。（IG截圖）

　　近日推出新碟的張敬軒，昨日凌晨兩點即興在社交網玩直播，軒仔見許廷鏗及王菀之收看，於是致電他們分別加入直播，有星級嘉賓助陣，雖然已夜深，但仍吸引逾萬人觀看。軒仔與許廷鏗傾偈時，乘機要求對方幫他箍牙，許廷鏗見前輩開聲，當然一口答應。及後，軒仔，再找人妻Ivana談心，躺在床上的Ivana頭髮蓬鬆，不介意睡相展露人前，軒仔抵死說︰「我覺得你靚咗。」得悉軒仔曲綫「讚美」，Ivana哈哈大笑稱︰「依家凌晨兩點幾，你覺得我會做緊乜呢？我梗係無化妝啦！」

王菀之和老公Eric結婚五年，相當恩愛。

　　看到Ivana獨守空房，床上只得一堆凌亂的睡衣，老公Eric卻無影，軒仔口不擇言說︰「依家由AV變成恐怖片呀，大佬！」Ivana不怒反笑︰「如果夏天會好睇啲，但我好怕凍，瞓覺着咗衛衣，裏面仲有件保暖內衣，依家成身汗，我仲有三張被，你知點解佢（Eric）唔入嚟啦，哈哈！」軒仔即說︰「老公驚會生熱痱。」不少粉絲留下笑到喊Emoji，十分搞笑。二人更合唱一小段「撞音版」《我真的受傷了》，軒仔亦獻唱新歌《俏郎君》，令歌迷聽出耳油。