• |
  • 極速報價
  • |
  • 會員
  • 產品服務 / 串流版
  • 設定

05/12/2017

泛民初選名單終出爐 曾健超為撐姚松炎突褪軚

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

民主派嘅初選名單終於出爐啦!相比起建制派嘅效率,民主派其實遲咗成個月有多,仲未計下年1月先至完成個初選!不過遲到好過冇到,民主派真係要急起直追!你睇對家已經Banner廣告處處喇!

 

曾健超(左二)忽然退選,而家九龍西同新界東都係有3人參加初選。

 

姚松炎轉戰直選 曾健超突褪軚

 

  負責協調同組織今次初選嘅民主動力今日開記招,公布九龍西同埋新界東嘅初選名單,Jenny就同大家一齊嚟睇睇先:九龍西就有4人參加,包括民協馮檢基、曾健超、姚松炎同埋民主黨袁海文;而新界東就有3人,包括新民主同盟范國威、工黨郭永健同埋張秀賢。

 

  份名單同之前流傳出嚟嘅冇咩分別,姚松炎最後都決定咗轉戰直選,劍指九西;反而同為九龍西初選參選人之一嘅曾健超(阿Ken)就係呢個時候話即時退選噃!雖然一直有消息話佢諗住退選,不過Jenny就估唔到會係呢個moment宣布添!身邊嘅行家都感嘆咗一句:「哎呀,又要重製過張圖喇!」

 

九龍西初選而家有3人參加,包括(左起)民主黨袁海文、民協馮檢基、姚松炎。阿Ken宣布退選後變咗「搭檯」。

 

初選點玩法?三部曲時間抆到爆

 

  咁樣搞一大輪,玩咩?阿Ken解釋話,本身係希望將自決派、本土派嘅聲音帶入議會,加上教授(姚松炎)一直冇話參與,所以自己先會參選,既然而家教授去馬,佢個人亦都絕對支持被DQ嘅議員應該優先參加,所以就決定退選。就係咁,而家九龍西同新界東都係有3人參加初選。

 

  可能各位讀者會問:究竟初選係點玩法呢?民主動力嗰邊就話會分三部分:第一部分,會以隨機方式電話訪問約1000名當區市民,喺今年12月中至下年1月中進行,佔比率45%;第二部分就係實體票站投票(實投),九龍西同新界東分別設3及4個票站畀選民實投,比率都係佔45%,會喺1月14日進行;第三部分就係由政治及地區組織派出代表投票,佔10%。初選結果就會喺實投第二日,即係1月15日公布。

 

新界東亦有3人,包括:(左起)工黨郭永健、張秀賢同新民主同盟范國威。

 

易拉架砸頭 真係大吉利是!

 

  民主動力嘅召集人趙家賢話,咁樣的話,勝出者就可以趕得切喺提名期一開始就報名,如果真係去到最壞結果,例如過唔到確認書或者其他參選要求嘅,都可以由得分第二高嘅「Plan B」報名。因為根據過往經驗,選管會會喺幾日內,最多一個星期就會通知你合唔合資格,而提名期有兩個星期,除非政府「使橫手」,如果唔係都會有充足嘅時間準備Plan B嘅!不過政府使唔使「橫手」Jenny就唔知喇,Jenny淨係見到個記招時,後面塊易拉架就係咁跌落嚟,砸到一班參選者個頭,佢地都唔知出手擋咗幾多次,真係好似唔係幾吉利咁囉……

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生