• |
  • 極速報價
  • |
  • 會員
  • 產品服務 / 串流版
  • 設定

05/01/2018

袁國強鬆人笑笑口 鄭若驊接手樣好愁

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  今日Jenny一瞓醒就收到個大消息,就係律政司司長袁國強正式公布佢辭咗職喇!接任人果然就係之前盛傳嘅人選、資深大律師鄭若驊(Teresa)。特首林鄭仲即日帶埋新舊司長一齊見記者添!咁大件事,Jenny梗係要快快手起身化妝見人啦!

 

真係隔住個mon都feel到新舊司長嘅心情有幾兩極。

 

新舊司長齊現未笞夠問題就閃人

 

  其實袁司長話辭職都話咗幾個月,由過渡新政府開始就講到而家,消息都可以話係日日新鮮,不過律政司辦公室一概以「我們不作評論」六個大字答晒,今日終於都講實咗,咁咪幾好,Jenny同一眾行家都唔使再日日煩住律政司嘅新聞秘書喇!

 

  而今日林鄭帶住兩位新舊司長出嚟嘅時候,Jenny就見到袁司長嘴角含笑、好風騷咁噃!咁又係嘅,話晒今日就last day,終於唔使再就之前咁多個爭議話題畀人日質夜質,日鬧夜鬧,諗起都輕鬆唔少。離開熱廚房,感覺好清爽!呢個時候Jenny真係要套用佢前上司CY嘅一句說話:「有時真係忍唔住笑」!

 

袁國強表情輕鬆 Teresa笑容欠奉 

 

  不過Teresa今日個臉色就好似唔係幾好咁噃!全程笑容欠奉,唔通佢已經預視到一上任就要面對嘅工作一啲都唔簡單?而且話說之前喺林鄭組班嗰時,Teresa咪已經請咗佢食檸檬,話唔入熱廚房,何解半年後又回心轉意呢?相信好多人都同Jenny有同一個疑問,但係Teresa都未開口,林鄭就搶答咗先:「我唔會評論組班嘅過程……但好肯定鄭若驊係非常適當嘅人選。」OK,除咗林太嘅諗法,Jenny仲好想知Teresa係點諗囉!點知林鄭同袁司長答完一條英文提問之後就轉身走人,Teresa除咗開場白,都冇開過金口答記者提問,睇嚟佢第一日返工嗰時,都會有大批行家喺政總門口守候佢返office喇!

 

芬姐力sell Teresa非常專業

  律政司易帥,啲舊雨新知梗係要出嚟comment一下啦!當中大家都估到建制派梗係有讚無彈啦!嗱!Jenny就覺得當中尤以經民聯梁美芬Sell得最落力,話好高興見到Teresa出任喎!仲話自己識咗Teresa好多年,大讚佢「非常專業」添!相比之下,民建聯主席李慧琼(琼子)就保守好多,淨係話期望Teresa上任後可以盡快處理同佔領運動有關嘅案件同埋順利做好「一地兩檢」嘅本地立法工作喎!睇嚟民記都對新任SJ都未係好熟,睇嚟要快啲趁今個星期六日食個飯交流吓喇!

 

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App        財智‧健康‧品味生活
【立即下載】
iOS版: http://goo.gl/5qT9Op
Android版: http://goo.gl/nc3xAn
我要回應

你可能感興趣

  • 生活副刊
  • DIVA
  • 健康好人生