• |
  • 極速報價
  • |
  • 會員
  • 產品服務 / 串流版
  • 設定

24/04/2018

Package Lau講「樓」 發展農地Action Now?

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  講起劉鳴煒,大家會諗起咩呢?大劉個仔?華置主席?定係青年事務委員會主席?作為女性嘅Jenny就梗係最記得佢個靚靚Package啦!如果唔係點會被人叫佢做Package Lau呢!

 

 

Package Lau仲係智經研究中心嘅副主席嚟!

 

Package Lau:心理作用嚟啫!

 

  不過Package Lau又點只咁少銜頭,佢仲係智經研究中心嘅副主席嚟添!大家都知政府講咗好耐嘅「土地大辯論」就會喺後日(26日)展開,辯論嘅其中一個項就包括「以公私合營模式發展地產商囤積的農地」,今日智經就先發表咗個《調查,睇吓社會對公私營合作發展房屋同埋「港人首置上車盤」有咩睇法。

 

  結果發現四成人都驚公私合營會有助政府同地產商輸送利益。Package Lau就同Jenny講,覺得政府唔應該怕敏感或爭議性而唔做,又話市民驚利益輸送,只不過係心理作用,仲叫驚嘅人解釋吓覺得點解會有利益輸送。

 

地價貴到華置都唔想買

 

  但身為華置主席,Package Lau好難免畀人質疑有利益衝突噃!佢就話佢哋公司都喺新界有啲農地,不過都係好零碎,公司呢幾年亦都因為地價貴而冇投地喇喎!不過唔知係唔係被人窒而嬲豬咗,有行家提到點解唔用《土地收回條例》嚟收返啲地起屋,佢即刻搶白:「你覺得會好快咩?」跟著就話呢啲可能會涉及法律問題,搞搞下可能短中期都變長期喎!雖然Package Lau好快就回復返平靜嘅聲線,不過前面嗰句咁有火,Jenny都被佢嚇咗一下!

 

「大辯論」隨時只得「大辯」

 

  但同樣研究房屋發展嘅姚松炎(姚教授)就唔同睇法喇!佢同Jenny講,以前用公私合營發展,都試過出現官商勾結、利益輸送嘅情況,所以先會叫停,所以擔心都係有事實根據嘅!姚教授又覺得Package Lau個智庫做調查時,問受訪者支唔支持「以公私合營模式發展地產商囤積的農地」,咁會有啲人係支持發展農地,但未必支持用公私合營模式,但題目咁寫,佢哋就只能答「支持」,得出個數就唔準囉!

 

  「土地大辯論」未正式開始,各方已經一直隔空駁火,到大家坐埋一枱嗰陣傾,會唔會又變咗你有你講我有我鬧,結果「大辯論」變成只得「大辯」但冇「(結)論」……?希望唔會啦!香港人為咗有個安樂窩已經用咗好多時間喇!

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生