• |
  • 極速報價
  • |
  • 會員
  • 產品服務 / 串流版
  • 設定

09/05/2019

林鄭泛民全面開戰 今日立會金句百出

  • 加入最愛專欄
  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  久違了嘅行政長官答問會今日又來了,呢排《逃犯條例》咁Hit,Jenny都估到今日大家都重點攻擊呢個議題,果不其然,今朝呢個半鐘火花四濺,金句百出!主席梁君彥趕人出會議廳都趕到手軟呀!

 

 

 

林鄭嬲豬:「全部都係廢話!」

 

  唔少法律界人士話回歸時港府係刻意喺《逃犯條例》剔除中國,而家個政府就梗係唔同意喇!特首林鄭今日就喺答質詢時再Loop一次都好正常,點知佢仲話,唔係好似有啲人所講嘅係怕回歸後內地嘅法制,更加唔係有啲人所講,連中方都同意喺中英聯絡小組中,中方自己都驚如果包括內地會影響香港順利移交,「全部都係廢話」!

 

  「全部都係廢話」,呢句簡直係一錘定音!民主派一聽當然即係嘩然。召集人毛孟靜(Miss Mo)即時就指責林鄭係「講大話」,點知就畀主席話佢指控嚴重同埋冒犯,要趕佢出會議廳。

 

  平時出名「和理非非」嘅民主黨大佬胡志偉今日都要爆Seed喇!指佢「有黨性、有奴性,但你就冇血性、冇人性」,係自行破壞中港嘅防火牆。林鄭就話呢啲指控係誣衊,又話自己唔想批評以前政府,但自己唔可以唔撐保安局局長李家超話政府「鴕鳥」咗22年。

 

胡志偉爆Seed:「八婆!」

 

  胡志偉大聲指責林鄭破壞「一國兩制」,梁君彥又逐埋佢出去,點知鏡頭一轉,就影到林鄭擰頭兼疑似冷笑嘅一面,唔知係咪因為咁,胡志偉被逐時就話林鄭:「你唔死都冇用呀,八婆!」聽到Jenny同行家「嘩!嘩!」聲!印象中,一直秉持「和理非非」嘅志偉,最激都係今次喇!

 

  不過講返轉頭,話人「講大話」呢樣嘢喺立法會真心好常見,議員鬧官員指鹿為馬、「大話精」、「呃人」都試過好多次,淨係就咁Search相關新聞都幾百條。除咗立法會之外,前任特首梁振英被唐英年話「你呃人」呢一幕仲堪稱經典添!Jenny就諗,到底係話人講大話大件事啲,定係講大話大件事啲先?

 

  梁君彥喺傍晚就出嚟「解畫」,話根據英國議會嘅例子,話人「講大話」係不當用語、嚴重指控嚟,所以要求毛孟靜收返,仲話呢個裁決已經成為咗案例㗎啦!咁係咪真係喺議會可以講大話,唔可以話人講大話?梁君彥就笑眯眯咁講,「曾主席講過,議員講既野未必需要事實」就走咗啦!正所謂「主席的裁決是不容辯論」,Jenny今日真係見識到啦!

 

「港元定存息率」大比拼 食息都要食得醒 https://goo.gl/i9KA4Y
我要回應

你可能感興趣

  • 生活副刊
  • DIVA
  • 健康好人生